ބިރުގަތުމުގެ ދަލީލަކީ:
ﷲ ތަޢާލާގެ ވަޙީބަސްފުޅު:
فَلَا تَخَافُوهُمْ وَخَافُونِ إِن كُنتُم مُّؤْمِنِينَ([1])
މާނައީ: “ތިޔަބައިމީހުން އެމީހުންދެކެ ބިރުނުގަންނާށެވެ. އަދި ތިޔަބައިމީހުންނީ މުއުމިނުންކަމުގައި ވަނީނަމަ ތިމަން އިލާހަށް ބިރުގަންނާށެވެ.”
އުންމީދުކުރުމުގެ ދަލީލަކީ:
ﷲ ތަޢާލާގެ ވަޙީބަސްފުޅު:
فَمَن كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا([2])
މާނައީ: “ފަހެ އެމީހާގެ ރައްބާ ބައްދަލުވުމަށް އެދޭމީހާ، އެމީހާ ޞާލިޙު ޢަމަލު ކުރާހުށިކަމެވެ. އަދި އޭނާގެ ރައްބަށް ކުރާ އަޅުކަމުގައި ހަމައެކައްޗެއްވެސް ބައިވެރިނުކުރާހުށިކަމެވެ.”
ވަކީލުކުރުމުގެ ދަލީލަކީ:
ﷲ ތަޢާލާގެ ވަޙީބަސްފުޅު:
وَعَلَى اللَّـهِ فَتَوَكَّلُوا إِن كُنتُم مُّؤْمِنِينَ([3])
މާނައީ: “ތިޔަބައިމީހުންނީ މުއުމިނުންކަމުގައިވާނަމަ ﷲ އަށް ވަކީލުކުރާށެވެ.”
އަދިވެސް ވަޙީކުރައްވާފައިވެއެވެ.
وَمَن يَتَوَكَّلْ عَلَى اللَّـهِ فَهُوَ حَسْبُهُ([4])
މާނައީ: “ﷲ އަށް ވަކީލުކޮށްފިމީހަކަށް ފަހެ އެއިލާހު ފުދެއެވެ.”
އުންމީދާއެކު އެދުމާއި ރެކުމުގެބިރުގަތުމާއި މަޑުމޮޅިވެމަޑުމައިތިރިވުމުގެ ދަލީލަކީ:
ﷲ ތާޢާލާގެ ވަޙީބަސްފުޅު:
إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَبًا وَرَهَبًا ۖ وَكَانُوا لَنَا خَاشِعِينَ([5])
މާނައީ: “ހަމަކަށަވަރުން އެބޭކަލުންނީ ހެޔޮކަންކަމުގައި އަވަސްވެގަންނަވާބައެއްކަމުގައި ވެވަޑައިގަތެވެ. އަދި ތިމަންއިލާހަށް އެދުމާއި ބިރުވެތިކަމާއެކު ތިމަންއިލާހަށް ދުޢާކުރައްވާކަމުގައި ވިއެވެ. އަދި އެބޭކަލުންނީ ތިމަންއިލާހަށް މަޑުމައިތިރިވާ ބަޔަކު ކަމުގައިވިއެވެ.”
ބިރުވެތިވުމުގެ ދަލީލަކީ:
ﷲ ތަޢާލާގެ ވަޙީބަސްފުޅު:
فَلَا تَخْشَوْهُمْ وَاخْشَوْنِي([6])
މާނައީ: “ފަހެ ތިޔަބައިމީހުން އެމީހުންދެކެ ބިރުނުގަންނާށެވެ. އަދި ތިމަންއިލާހަށް ތިޔަބައިމީހުން ބިރުގަންނާށެވެ.”
ތައުބާގެ ދަލީލަކީ:
ﷲ ތަޢާލާގެ ވަޙީބަސްފުޅު:
وَأَنِيبُوا إِلَىٰ رَبِّكُمْ وَأَسْلِمُوا لَهُ ([7])
މާނައީ: “އަދި ތިޔަބައިމީހުން، ތިޔަބައިމީހުންގެ ރައްބަށް ތައުބާވާށެވެ. އަދި އެއިލާހަށް ކިޔަމަންތެރިވާށެވެ.”
ފިލާވަޅުގެ އިރުޝާދުތައް
* ބިރުގަތުމާއި ބިރުވެތިވުމާ އަދި ރެކުމުގެ ބިރުވެތިކަމަކީ އޭގެ މާނަ އެއްގޮތް އަޅުކަންތަކެކެވެ. މިއެންމެ އަޅުކަންތައްވެސް ހަމައެކަނި ﷲ އަށްޓަކައި އަދާކުރުން ވާޖިބުވެގެންވެއެވެ. އެކަންކުރާނީ ﷲ އަށް ބިރުވެތިވާޙާލު އެއިލާހު ޙަރާމްކުރެއްވި އެންމެހާ ކަންތައްތަކުން ދުރުހެލިވެގެންނެވެ.
* އުންމީދުކުރުމާއި އުންމީދާއެކު އެދުމަކީ ދެ އަޅުކަމެވެ. އެކަން ޙާޞިލުވާނީ މުއުމިނު އަޅާ ﷲ ގެ ފަޟްލުވަންތަކަމާއި ރުއްސެވުމަށް އެދި، އެކަން ޙާޞިލުކުރުމަށްޓަކައި މަސައްކަތްކުރުމުންނެވެ. އެކަންކުރާނީ އެއިލާހަށް ކިޔަމަންތެރިކަން އަދާކުރުމާއެކު އެއިލާހު ނަހީކުރެއްވި ކަންތައްތަކުން ދުރުހެލިވެގެންނެވެ.
* ވަކީލުކުރުމަކީ ﷲ ތަޢާލާއަށް ހިތް ބަރޯސާކޮށް، އެއިލާހާ މެދު ހެޔޮކޮށް ހީކުރުމެވެ. އެފަދައިން ޢަމަލުކޮށްފިމީހާ ދަންނައެވެ. ފަހެ ހަމަކަށަވަރުން އޭނާގެ ހުރިހާ ކަންބޮޑުވުމަކާއި ހުރިހާކަމެއްގައި އޭނާއަށް ﷲ ފުދޭނެއެވެ. އަދި އޭނާ ހީވެސް ނުކުރާ ގޮތްގޮތުން އެއިލާހު އޭނާއަށް ރިޒްޤުދެއްވާނެއެވެ.
* ތައުބާގެ މާނައަކީ: ﷲ ތަޢާލާގެ ޙަޟްރަތަށް ރުޖޫޢަވެ މަޑުމޮޅިވެ އެއިލާހުގެ ރަޙްމަތަށް އުންމީދުކުރުމެވެ.
* އެންމެހާ އަޅުކަމެއްވެސް އަދާކުރަންޖެހޭނީ ހަމައެކަނީ ﷲއަށެވެ. އެއްވެސް މަޚްލޫޤަކަށް އެއިންކަމެއް އަދާކޮށްގެން ނުވާނެއެވެ.
ސުވާލުތައް
- އަންނަނިވި ހުސްތަންތަން ފުރާށެވެ.
އަޅުކަމުގެ ވައްތަރުތަކުގެ ތެރޭގައި: ބިރުގަތުމާއި ، ……………………. ، ……………………. ، ……………………. ، ……………………. ހިމެނެއެވެ.
- އަންނަނިވި ކަލިމަތައް އެއާ ގުޅޭ މާނައާ ގުޅުވާށެވެ.
| * ބިރުގަތުމަކީ: | – ﷲ ތަޢާލާއަށް ހިތް ބަރޯސާކުރުމެވެ. |
| * ވަކީލުކުރުމަކީ: | – ﷲ ތަޢާލާގެ ޙަޟްރަތަށް ރުޖޫޢަވުމެވެ. |
| * ތައުބާވުމަކީ: | – ﷲ އަށް ބިރުވެތިވާޙާލު އެއިލާހު ޙަރާމްކުރެއްވި އެންމެހާ ކަންތައްތަކުން ދުރުހެލިވެގަތުމެވެ. |
- އަންނަނިވި ކަންކަމަށް ކީރިތި ޤުރުއާނުން ދަލީލު ބަޔާންކުރާށެވެ.
1- އުންމީދުކުރުން
2- ވަކީލުކުރުން
3- މަޑުމޮޅިވެމަޑުމައިތިރިވުން
4- ތައުބާވުން
5- އުންމީދާއެކު އެދުން
______________________________
