އިޙްސާންކަމުގައިވަނީ އެންމެ ރުކުނެކެވެ. އެއީ ތިބާ ﷲ ސުބުޙާނަހޫ ވަތަޢާލާ ދެކެދެކެހުރެ އަޅުކަންކުރާ ފަދައިން އަޅުކަންކުރުމެވެ. އެގޮތަށް އަޅުކަން ނުކުރެވޭނަމަ އެ އިލާހު ތިބާ ދެކެވޮޑިގެންވާކަން އެނގިހުރެ އަޅުކަންކުރުމެވެ. މިކަމުގެ ދަލީލަކީ ﷲ ސުބުޙާނަހޫ ވަތަޢާލާގެ މި ވަޙީބަސްފުޅެވެ.
﴿إِنَّ اللَّـهَ مَعَ الَّذِينَ اتَّقَوا وَّالَّذِينَ هُم مُّحْسِنُونَ﴾ ([1])
މާނައީ: “ހަމަކަށަވަރުން ﷲ ވޮޑިގެންވަނީ ތަޤުވާވެރިވި މީހުންނާ އެކުގައެވެ. އަދި އިޙްސާންތެރިންނާވެސް އެކުގައެވެ.”
އަދި ﷲ ސުބްޙާނަހޫ ވަތަޢާލާގެ މި ވަޙީބަސްފުޅެވެ.
وَتَوَكَّلْ عَلَى الْعَزِيزِ الرَّحِيمِ﴿٢١٧﴾ الَّذِي يَرَاكَ حِينَ تَقُومُ ﴿٢١٨﴾ وَتَقَلُّبَكَ فِي السَّاجِدِينَ﴿٢١٩﴾ إِنَّهُ هُوَ السَّمِيعُ الْعَلِيمُ ﴿٢٢٠﴾([2])
މާނައީ: “އަދި ޢަޒީޒުވަންތަ، ރަޙީމުވަންތަ އިލާހަށް ކަލޭގެފާނު ވަކީލު ކުރައްވާށެވެ! [217] އެއިލާހީ، ކަލޭގެފާނު (ނަމާދަށް) ތެދުވެވަޑައިގަންނަވާހިނދު، ކަލޭގެފާނު ދެކެވޮޑިގެންވާއިލާހެވެ. [218] އަދި ސަޖިދަކޮށް ނަމާދުކުރާ މީހުންގެ ތެރޭގައި ކަލޭގެފާނު ޙަރަކާތްތެރިވެ ވަޑައިގަންނަވާތީވެސްމެއެވެ. [219] ހަމަކަށަވަރުން، އެއިލާހީ، މޮޅަށް އައްސަވާވޮޑިގެންވާ، މޮޅަށް ދެނެވޮޑިގެންވާ އިލާހެވެ. [220]”
އަދި ﷲ ސުބްޙާނަހޫ ވަތަޢާލާގެ މި ވަޙީބަސްފުޅެވެ.
﴿وَمَا تَكُونُ فِي شَأْنٍ وَمَا تَتْلُو مِنْهُ مِن قُرْآنٍ وَلَا تَعْمَلُونَ مِنْ عَمَلٍ إِلَّا كُنَّا عَلَيْكُمْ شُهُودًا إِذْ تُفِيضُونَ فِيهِ… ﴾ ([3])
މާނައީ: “ކަލޭގެފާނު ކޮންމެ ކަމެއްގައި އުޅުއްވިޔަސް، އަދި ކަލޭގެފާނު ޤުރުއާނުން ކޮންމެ އެއްޗެއް ކިޔަވާވިދާޅުވިޔަސް، އަދި ތިޔަބައިމީހުން ކޮންމެ ޢަމަލެއް ކުރިޔަސް، އެ ޢަމަލުގެ ތެރޭގައި ތިޔަބައިމީހުން އުޅޭހިނދު، ތިޔަބައިމީހުންގެ މައްޗަށް ތިމަންއިލާހު ހެކިވެވޮޑިގެންވާ ކަމުގައި މެނުވީ ނުވަމެވެ.”
ފިލާވަޅުގެ އިރުޝާދުތައް
* ތިބާކުރާ ޢަމަލުތައް ﷲ ތަޢާލާ ބައްލަވާ ވޮޑިގެންވާކަމާ އަދި އެކަންކަން ލިޔުއްވޭކަން ޔަޤީންނުކުރާހާ ހިނދަކު އިޙްސާންތެރިއެއް ނުވެވޭނެއެވެ.
* އިޙްސާންތެރިކަންވަނީ ދެ ކަމެއްގައެވެ.
– ނިޔަތް : އެއީ ދެއްކުންތެރިކަމާއި ނިފާޤުކަމުން އެ ސަލާމަތްކުރުމެވެ.
– ޢަމަލު : އެއީ ޝަރީޢަތުގައި އައިސްފައިވާގޮތަށް، ވަރުގަދަ ޢަޒުމަކާއެކު އެކަން ކުރުމެވެ.
ސުވާލުތައް
- ދީނުގެ ތިންހަރުފަތް ބަޔާންކުރާށެވެ.
- އިޙްސާންކަމަކީ ކޮބާ ހެއްޔެވެ؟
- އިޙްސާންކަން ހިމެނިގެންވަނީ ކޮން ކަންތައްތަކެއްގަ ހެއްޔެވެ؟
- އިޙްސާންކަމުގެ ދަލީލަކީ ކޮބާ ހެއްޔެވެ؟
- ފާފަކުރުންމަތީ ދެމިހުންނަ މީހަކު ތިބާއަށް ފެނުމުން، އޭނާއަށް ނަސޭހަތްދިނުމުން އޭނާ ބުންޏެވެ. “މީސްތަކުންނަށް މިކަމެއް ނުފެންނާނެއެވެ. އަދި މިކަމެއް ނުވެސް އެނގޭނެއެވެ.”
ފަހެ ޖަވާބުގައި އޭނާއަށް ބުނާނީ ކީކޭ ހެއްޔެވެ؟
___________________________________
