ރަމަޟާން މަހުން ޤަޟާކުރަން ޖެހިފައިވާ ރޯދަތަކެއްވާ މީހަކަށް، އޭނާ ޤަޟާކުރަން ޖެހިފައިވާ ރޯދައިގެ އަދަދާމެދުގައި ޝައްކުވެއްޖެނަމަ އޭނާ ހަދާނީ ކިހިނެތް ހެއްޔެވެ؟ އޭނާއަށް ދޫވެފައިވަނީ 4 ރޯދަތޯ ނުވަތަ 3 ރޯދަތޯ ޔަޤީނެއް ނޫނެވެ. މިހާރު އޭނާ 3 ރޯދަ ހިފައިފިއެވެ.
(ރަމަޟާން މަހުން) ޤަޟާކުރުން ވާޖިބުވެފައިވާ ރޯދަތަކުގެ އަދަދާމެދު ޝައްކުވެއްޖެނަމަ، ފަހެ އޭނާ ހިފާނީ އޭގެ މަދު މިންވަރެވެ. (އެބަހީ: އޭނާ ޤަޟާކުރަން ލާޒިމުވެފައިވާ، ޔަޤީން މިންވަރެވެ.) މިސާލަކަށް އަންހެނަކު ނުވަތަ ފިރިހެނަކު ޤަޟާކުރަން ޖެހިފައިވަނީ 3 ރޯދަތޯ ނުވަތަ 4 ރޯދަތޯ ޝައްކުވެއްޖެނަމަ، ފަހެ އޭނާ ޤަޟާކުރާނީ މަދު މިންވަރެވެ. (އެބަހީ: 3 ރޯދައެވެ.) އެއީ ޔަޤީންވެގެންވާ މިންވަރެވެ. އެއަށްވުރެ އިތުރުވާ މިންވަރަކީ (އެބަހީ: 4 ވަނަ ރޯދައަކީ) ޝައްކުވެފައިވާ މިންވަރެވެ. (އެހެންކަމުން 3 ރޯދަ ހިފުމުން) އަޞްލަކީ އޭނާގެ ޒިންމާއިން ބަރީއަވެގެންވުމެވެ.
ނަމަވެސް އެންމެ ރައްކާތެރި ގޮތަކީ އޭނާއަށް ޝައްކުވެފައި އެވާ ދުވަހުގެ ރޯދަވެސް ޤަޟާކުރުމެވެ. އެއީ:
– އެ ރޯދައަކީ އޭނާ ޤަޟާކުރުން ވާޖިބު ރޯދައެއް ނަމަ، އެ ރޯދަ ހިފުމުން ޔަޤީނުންވެސް އޭނާގެ ޒިންމާއިން ބަރީއަވީއެވެ.
– އެ ރޯދައަކީ އޭނާ (ޤަޟާކުރުން) ވާޖިބުވެފައިވާ ރޯދައެއް ނޫންނަމަ އެ ރޯދަ ވެގެންދާނީ ސުންނަތް ރޯދައަކަށެވެ. އިޙްސާންތެރީންގެ އަޖުރު ﷲ ތަޢާލާ ގެއްލެނި ނުކުރައްވާނެއެވެ.
ފަޟީލަތުއްޝައިޚް މުޙައްމަދު ބުން ޞާލިޙުލް ޢުޘައިމީން – رحمه الله –
[فتاوى نور على الدرب (11 / 2)]
