އިޢުތިކާފްގެ ބައެއް އަދަބުތައް
ތިރީގައި މިބަޔާންކޮށްލަނީ އިޢުތިކާފަށް އިނުމުގައި ސަމާލުކަންދޭން ޖެހޭ އަދަބުތަކުގެ ތެރެއިން، ނަބިއްޔާ ޞައްލަﷲ ޢަލައިހި ވަސައްލަމަގެ ސުންނަތުގެ އަލީގައި ޢިލްމުވެރިން ބަޔާންކުރައްވާ ބައެއް އަދަބުތައް.
1 – އިޚްލާސްތެރި ނިޔަތަކާއި އެކު އިޢުތިކާފަށް ވަނުން.
2 – އިޢުތިކާފަށް އިންނަ ހަޤީޤީ މަޤްޞަދުކަމުގައިވާ، ދުނިޔެވީ ކަންތައްތަކާއި ދުރުވެ، ﷲ ތަޢާލާއަށްޓަކައި މިސްކިތުގައި އިންނަ އިނުމެއްކަމުގައި ހިތްމަތީގައި އަބަދުވެސް ބެހެއްޓުން.
3 – ކޮންމެހެން ދައްކަން ޖެހިއްޖެ ވާހަކައެއް ފިޔަވައި ދުނިޔެވީ ވާހަކަތައް ދެއްކުމުން ދުރުހެލިވުން. އަދި ބޭކާރު ވާހަކަތައް ދެއްކުމުން ދުރުހެލިވުން.
4 – ފަރުޟު ނަމާދުތަކުގެ އިތުރަށް ރާވާތިބު ސުންނަތްތަކާއި ޟުޙާ ނަމާދުފަދަ ސުންނަތް ނަމާދުތަކަށް ރައްކާތެރިވުން.
5 – ކެއުމާއި ނިދުން މަދުކޮށް ނަމާދުކޮށް ޒިކުރުކޮށް ދުޢާކޮށް ޤުރުއާން ކިޔެވުން ގިނަކުރުން.
6 – ކޮންމެހެން ނުކުންނަން ޖެހިއްޖެ ޟަރޫރީ ޙަލަތެއްގައި މެނުވީ މިސްކިތުން ނުނިކުތުން.
7 – ސާފްތާހިރު ވުމަށް ސަމާލުކަން ދިނުން.
8 – އިޢުތިކާފަށް އިންނަމީހާ، އިޢުތިކާފަށް އިނުމަށް މިސްކިތުގެ ވަކި ތަނެއް ޚާއްސަކުރުން.
9 – އަދި މީސްތަކުންނާއި ވީހާވެސް އެކަހެރިކޮށް އަޅުކަމުގައި ގިނަވަގުތު ހޭދަކުރުން.
10 – ޖަދަލުކުރުމާއި ޣީބަ ބުނުންފަދަ އެއްމެހައި ޢަމަލުތަކުން ދުރުހެލިވުން.
11 – އިޢުތިކާފަށް އިންނަ މީހާއަށް ސުންނަތް ވެގެންވަނީ، އިޢުތިކާފުގައި އިންނަ ޙާލަތުގައި ޖަނާޒާގައި ބައިވެރިނުވުމާއި، ދަޢުވަތަށް އިޖާބަނުދިނުމާއި، ބަލިމީހުންނަށް ޒިޔާރަތް ނުކުރުމެވެ.
