ސުވާލު 5: – وَأَنَّ مُحَمَّدًا عَبْدُهُ وَرَسُولُهُ (މުޙައްމަދުގެފާނީ ﷲ ގެ އަޅާ އަދި ރަސޫލާއެވެ.) މިބަހުގެ މާނައަކީ ކޮބައި ހެއްޔެވެ؟
– އަދި އެކަމަށް ހެކިވުން ލާޒިމް ކޮށްދެނީ ކޮންކަމެއް ހެއްޔެވެ؟
ޖަވާބު: – وَأَنَّ مُحَمَّدًا عَبْدُهُ وَرَسُولُهُ (މުޙައްމަދުގެފާނީ ﷲ ގެ އަޅާ އަދި ރަސޫލާއެވެ.) މިބަހުގެ މާނައަކީ މުޙައްމަދު صلى الله عليه وسلم އީ ﷲ ގެ އަޅާ އަދި އެކަލާނގެ ރަސޫލާކަމަށް ހެކިވުމެވެ.
– މުޙައްމަދުގެފާނީ ﷲ ގެ އަޅާ އަދި ރަސޫލާކަމަށް ހެކިވުން ލާޒިމްކޮށްދެނީ އެކަލޭގެފާނަށް އީމާންވުމެވެ. އަދި އެކަލޭގެފާނު ގެންނެވި ހުރިހާ ޚަބަރެއް ތެދުކުރުމާއި، އެކަލޭގެފާނު އަމުރުކުރެއްވި އެންމެހާ ކަންތައްތަކަށް ބޯލަނބައި ކިޔަމަންތެރިވުމާއި އަދި އެކަލޭގެފާނު ނަހީކުރެއްވި އެންމެހާ ކަންތައްތަކުން ދުރުހެލިވުމެވެ. އެކަލޭގެފާނަކީ ﷲ ގެ އަޅެކެވެ. އެކަލޭގެފާނަށް އަޅުކަންކުރުން ހުއްދަވަވެގެންނުވެއެވެ. އަދި އެކަލޭގެފާނަކީ ﷲ ގެ ރަސޫލެކެވެ. އެކަލޭގެފާނު ވިދާޅުވާ ބަސްފުޅުތައް ދޮގެއް ނުކުރެވޭނެއެވެ. އަދި ކިއެއްތަ، އެކަލޭގެފާނަށްވަނީ ބޯލަނބައި ކިޔަމަންތެރިވުމެވެ.
ސުވާލު 6: – وَأَنَّ عِيسَى عَبْدُ اللَّهِ وَرَسُولُهُ (ޢީސާގެފާނީ ﷲ ގެ އަޅާ އަދި އެކަލާނގެ ރަސޫލާއެވެ.) މި ބަސްފުޅުގެ މާނައަކީ ކޮބައި ހެއްޔެވެ؟ އަދި މިބަސްފުޅުން ރައްދު ދެވެނީ ކޮން ބަޔަކަށް ހެއްޔެވެ؟
– وَكَلِمَتُهُ أَلْقَاهَا إِلَى مَرْيَمَ وَرُوحٌ مِنْهُ (އަދި އެކަލޭގެފާނަކީ މަރްޔަމްގެފާނުގެ ހަށިކޮޅުގައި އެކަލާނގެ ލެއްވި (كن) [ވާށޭ] މިކަލިމަފުޅުގެ ނަތީޖާކަމާއި އެކަލާނގެ ހެއްދެވި ފުރާނަތަކުގެ ތެރެއިން ފުރާނައެކެވެ.) މި ބަސްފުޅުގެ މާނައަކީ ކޮބައި ހެއްޔެވެ؟
– كَلِمَةُ الله (ﷲ ގެ ކަލިމަފުޅު) މިނަން ޢީސާ عليه السلام އަށް ދެވުނީ ކީއްވެ ހެއްޔެވެ؟
ޖަވާބު: – وَأَنَّ عِيسَى عَبْدُ اللَّهِ وَرَسُولُهُ (ޢީސާގެފާނީ ﷲ ގެ އަޅާ އަދި އެކަލާނގެ ރަސޫލާއެވެ.) މިބަސްފުޅުގެ މާނައަކީ ޢީސާގެފާނީ ﷲ ގެ އަޅާ އަދި އެކަލާނގެ ރަސޫލާ ކަމަށް ހެކިވުމެވެ. އަދި މި ބަސްފުޅުން ރައްދު ދެވެނީ ނަޞާރާއިންނާއި ޔަހޫދީންނަށެވެ. ނަޞާރައިން އެއީ ޢީސާގެފާނަކީ ﷲ ކަމަށް ނުވަތަ ﷲ ގެ ދަރިކަލެއްކަމަށް ނުވަތަ 3 އިލާހުން ކުރެ އެއްއިލާހުކަމަށް ޤަބޫލުކުރި މީހުންނެވެ. އެބައިމީހުން އެބުނާ ބަސްތަކުން ﷲ ޞުބުޙާނަޙޫ ވަތަޢާލާ ހުސްތާހިރުވެ ވޮޑިގެން އަދި ބޮޑުވެގެންވާ މަތިވެރިވުމަކުން މަތިވެރިވެ ވޮޑިގެންވެއެވެ. އަދި ޔަހޫދީން ދަންނައެވެ. އެބައިމީހުން ޢީސާ عليه السلام އީ ޒިނޭގެ ދަރިއެއްކަމަށް ބުނެއެވެ. ﷲ އެބައިމީހުންނަށް ލަޢުނަތް ލައްވާށިއެވެ. އެހެންކަމުން އެބައިމީހުން (އެބަހީ: ޔަހޫދީންނާއި ނަޞާރާއިން) ޢީސާ عليه السلام އާއި ބެހޭގޮތުން އެބުނާ ބަސްތައް އެނގޭ ކޮންމެ މީހެއްގެ އިސްލާމްކަން ސައްޙަވާނީ އެމީހުން (އެބަހީ: ޔަހޫދީންނާއި ނަޞާރާއިން) އެބުނާ ބަސްތަކުން ބަރީއަވެ، ދުރުހެލިވުމުންނެވެ.
– وَكَلِمَتُهُ أَلْقَاهَا إِلَى مَرْيَمَ (އަދި އެކަލޭގެފާނަކީ މަރްޔަމްގެފާނުގެ ހަށިކޮޅުގައި އެކަލާނގެ ލެއްވި (كن) [ވާށޭ] މިކަލިމަފުޅުގެ ނަތީޖާއެވެ.) މިބަހުގެ މާނައަކީ ޖިބްރީލްގެފާނު އެކަލިމަފުޅައިގެން ފޮނުއްވައި މަރްޔަމްގެފާނުގެ ހަށިކޮޅަށް ފުމެލެއްވުމުން ﷲގެ އަމުރުފުޅާއިއެކު ޢީސާގެފާނު ޚަލްޤުކުރެއްވުމެވެ. وَرُوحٌ مِنْهُ (އެކަލާނގެ ހެއްދެވި ފުރާނަތަކުގެ ތެރެއިން ފުރާނައެކެވެ.) މިބަހުގެ މާނައަކީ ﷲ އުފެއްދެވި ރޫހުތަކުގެ ތެރެއިން ރޫހެކެވެ.
– كَلِمَةُ الله (ﷲ ގެ ކަލިމަފުޅު) މިނަން ޢީސާ عليه السلام އަށް ދެވުނީ ﷲ ގެ “كن” (ވާށޭ) މިކަލިމަފުޅުން އެކަލޭގެފާނު ވުޖޫދަށް އައުމުންނެވެ.
* * * *
– އަލްޖާމިޢުލް ފަރީދް (ޝައިޚް ޢަބްދު ﷲ ބުން ޖާރު ﷲ ބުން އިބްރާހީމް އަލް ޖާރު ﷲ) –
މިފޮތަކީ ސުވާލާއި ޖަވާބުގެ އުސްލޫބަށް ކިތާބުއްތައުޙީދު ކިޔަވާ ދިނުމަށް ތައްޔާރުކުރެވިފައިވާ ފޮތެކެވެ.
