- ތަޤްވާވެރިން ވާހުށީ ސުވަރުގެ އާއި އެތަނުގައިވާ އެކި ނިޢުމަތްތަކުގައި
(إِنَّ الْمُتَّقِينَ فِي جَنَّاتٍ وَعُيُونٍ * ادْخُلُوهَا بِسَلَامٍ آمِنِينَ * وَنَزَعْنَا مَا فِي صُدُورِهِم مِّنْ غِلٍّ إِخْوَانًا عَلَىٰ سُرُرٍ مُّتَقَابِلِينَ * لَا يَمَسُّهُمْ فِيهَا نَصَبٌ وَمَا هُم مِّنْهَا بِمُخْرَجِينَ )[1]
މާނަ: “ހަމަކަށަވަރުން ތަޤުވާވެރިން ވަނީ ސުވަރުގެތަކާއި، ފެންއާރުތަކުގެ ނިޢުމަތުގައެވެ. * (އެއުރެންނަށް އަންގަވާނެތެވެ.) ތިޔަބައިމީހުން ސަލާމަތްކަމާއެކު، އަމާންކަން ލިބިގެންވާ ޙާލު އެތަނަށް ވަންނާށެވެ! * އަދި ތިމަންއިލާހު، އެއުރެންގެ ހިތްތަކުގައިވާ ޙަސަދަވެރިކަން ވަކިކުރެއްވީމެވެ. ދާންތަކެއްގެ މަތީގައި އެކަކު އަނެކަކަށް ކުރިމަތިލައިތިބޭ އަޚުންތަކެއްގެ ގޮތުގައެވެ. * އެއުރެންނަކަށް އެތާނގައި އެއްވެސް ވަރުބަލިކަމެއް ނުޖެހޭނެތެވެ. އަދި އެ ތަނުން ނެރުއްވާނެ ބަޔަކު ކަމުގައިވެސް އެއުރެން ނުމެވޭމެއެވެ.”
- ﷲ ބާވައިލެއްވި އެއްޗެހީގެ ޙަޤީޤަތް އެނގެނީ ތަޤްވާވެރިވުމުން
(وَقِيلَ لِلَّذِينَ اتَّقَوْا مَاذَا أَنزَلَ رَبُّكُمْ ۚ قَالُوا خَيْرًا)[2]
މާނަ: “ތަޤުވާވެރިވި މީހުންނަށް އަންގަވާނެތެވެ. ތިޔަބައިމީހުންގެ ވެރިރައްބު ބާވައިލެއްވީ ކޮންއެއްޗެއް ހެއްޔެވެ؟ އެއުރެން ދަންނަވާނެތެވެ. ހެޔޮ ގޮތެވެ.”
- ތަޤްވާވެރިންގެ ގޮވައްޗަށް ﷲ ތަޢާލާ ޘަނާކިޔުއްވާފައިވުމުން ދަލީލުކޮށްދެނީ، އެތަނުގައިވާ ނިޢުމަތުގެ ފުރިހަމަކަން
(وَلَدَارُ الْآخِرَةِ خَيْرٌ ۚ وَلَنِعْمَ دَارُ الْمُتَّقِينَ)[3]
މާނަ: “އަދި އާޚިރަތުގެ ގޮވަތި ހެޔޮކަން ބޮޑުކަން ކަށަވަރެވެ. އަދި ތަޤުވާވެރިންގެ ގޮވަތީގެ މޮޅުކަމާއެވެ!”
- ތަޤްވާގެ އަހުލުވެރިންނާއި މަރު ބައްދަލުކުރާނީ އެންމެ ހެޔޮވެގެންވާ ގޮތުގައި. އަދި މަލާއިކަތުން އެބައިމީހުންނަށް ސަލާމު ރައްދުކުރައްވާ، އެބައިމީހުންނަށް މާތްކޮށް ހިއްތަވާނެއެވެ.
(كَذَٰلِكَ يَجْزِي اللَّـهُ الْمُتَّقِينَ * الَّذِينَ تَتَوَفَّاهُمُ الْمَلَائِكَةُ طَيِّبِينَ ۙ يَقُولُونَ سَلَامٌ عَلَيْكُمُ ادْخُلُوا الْجَنَّةَ بِمَا كُنتُمْ تَعْمَلُونَ)[4]
މާނަ: “ތަޤުވާވެރިންނަށް ﷲ ޖަޒާ ދެއްވަނީ އެފަދައިންނެވެ. އެއުރެންނަކީ، ކުށްފާފަތަކުން ޠާހިރުވެގެންވާ ޙާލު، މަލާއިކަތުން އެއުރެން މަރުގަންނަވާ މީހުންނެވެ. (އެ ހިނދު) އެ މަލާއިކަތުން ވިދާޅުވާނެތެވެ. ތިޔަބައިމީހުންގެ މައްޗަށް ސަލާމް ހުށްޓެވެ. ތިޔަބައިމީހުން ކޮށްއުޅުނު ޢަމަލުތަކުގެ ސަބަބުން، ތިޔަބައިމީހުން ސުވަރުގެއަށް ވަންނާށެވެ!”
- ތަޤްވާއަކީ ﷲ ތަޢާލާގެ ޚާއްޞަ މަޢިއްޔަތު އެމިހަކާ އެކުވާ ސަބަބެއް
(إِنَّ اللَّـهَ مَعَ الَّذِينَ اتَّقَوا وَّالَّذِينَ هُم مُّحْسِنُونَ)[5]
މާނަ: “ހަމަކަށަވަރުން ﷲ ވޮޑިގެންވަނީ، ތަޤުވާވެރިވި މީހުންނާ އެކުގައެވެ. އަދި އިޙްސާންތެރިންނާވެސް އެކުގައެވެ.”
- ތަޤްވާއަކީ ރަސޫލު ބޭކަނލުންގެ ސިފަތަކުގެ ތެރެއިން ހިމެނޭ ސިފައެއް
(وَحَنَانًا مِّن لَّدُنَّا وَزَكَاةً ۖ وَكَانَ تَقِيًّا)[6]
މާނަ: “އަދި ތިމަންއިލާހުގެ ޙަޟްރަތުން އޯގާވެރިކަމާއި، ޠާހިރުކަން އެކަލޭގެފާނަށް ދެއްވީމެވެ. އަދި އެކަލޭގެފާނު ތަޤުވާވެރިޔަކު ކަމުގައިވިއެވެ.”
- ތަޤްވާގެ ސަބަބުން ސުވަރުގެ ވާރުތަވެގެން ދިއުން
(تِلْكَ الْجَنَّةُ الَّتِي نُورِثُ مِنْ عِبَادِنَا مَن كَانَ تَقِيًّا)[7]
މާނަ: “އެއީ ތިމަންއިލާހުގެ އަޅުންކުރެ، ތަޤުވާވެރިވީ މީހުންނަށް ތިމަންއިލާހު ވާރުތަކޮށްދެއްވާ ސުވަރުގެއެވެ.”
- ތަޤްވާއަކީ ނަރަކައިން މިންޖުވުމުގެ ސަބަބެއް
(ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا)[8]
މާނަ: “ދެން ތިމަންއިލާހު، ތަޤުވާވެރިވީ މީހުން ސަލާމަތް ކުރައްވާހުށީމެވެ. އަދި އަނިޔާވެރިވީ މީހުން، ކަކޫޖެހިގެންވާ ޙާލު، އެ ނަރަކައިގެ ތެރެއަށް ދޫކުރައްވާހުށީމެވެ.
- ތަޤްވާވެރިން މަޙްޝަރު ކުރެއްވޭނީ ﷲ ތަޢާލާގެ ޚާއްޞަ ވަފުދެއްގެ ގޮތުގައި މާތްކުރެވިފައިވާ ޙާލުގައި
(يَوْمَ نَحْشُرُ الْمُتَّقِينَ إِلَى الرَّحْمَـٰنِ وَفْدًا)[9]
މާނަ: “ތަޤުވާވެރިން، ރަޙްމާންވަންތަ އިލާހުގެ ޙަޟްރަތަށް (ޢިއްޒަތްތެރި) ވަފުދެއްގެ ގޮތުގައި ތިމަންއިލާހު އެއްކުރައްވާ ދުވަސް (ހަނދުމަކުރާށެވެ!).”
- ކީރިތި ޤުރުއާނަކީ ތަޤްވާވެރިންނަށް އުފާވެރި ޚަބަރުދޭ ފޮތެއް
(لِتُبَشِّرَ بِهِ الْمُتَّقِينَ وَتُنذِرَ بِهِ قَوْمًا لُّدًّا)[10]
މާނަ: “ކަލޭގެފާނު އެ ފޮތުން ތަޤުވާވެރިންނަށް އުފާވެރިކަމުގެ ޚަބަރު ދެއްވުމަށާއި، ދެކޮޅުވެރިވެގެންވާ މީހުންނަށް އެއިން އިންޛާރު ކުރެއްވުމަށްޓަކައެވެ.”
= ނުނިމޭ =
_____________________
މިއީ ޝައިޚް ޢުޘައިމީން ލިޔުއްވާފައި فوائد التقوى من القرآن الكريم ގެ ތަރުޖަމާއެވެ.
[1] الحجر 45-48
[2] 30 النحل
[3] 30 النحل
[4] 32-31 النحل
[5] 128 النحل
[6] 13 مريم
[7] 63 مريم
[8] مريم 72
[9] 85 مريم
[10] 97 مريم
