الحمد لله والصلاة والسلام على رسول الله وعلى آله وصحبه أجمعين.
ވިޔަފާރި މުދަލުން ޒަކާތް ނެރުން ވާޖިބުވަނީ ހިޖުރީ ގޮތުން އަހަރެއްވުމުން، ވިއްކުމަށް ބަހައްޓާފައި ހުރި މުދަލުގެ އަގުކޮށް އެއިން 2.5 ޕަސެންޓެވެ. އަގުކުރުމުގައި ބަލާނީ: އެ މުދާ ވިއްކާ އަގަށެވެ. އެ މުދާ ގަތް އަގަކަށް ނޫނެވެ. އަދި ގަނޑުކޮށް މުދާ ވިއްކާ މީހެއްނަމަ އަގުކުރާނީ ގަނޑުކޮށް ވިއްކާ އަގަށެވެ. އަދި ވަކިވަކިން ވިއްކާ މީހެއްނަމަ އަގުކުރާނީ ވަކިން ވިއްކާ އަގަށެވެ.
އަދި އަހަރު ނިމޭއިރުގައި އަތުގައި ހުރި ވިޔަފާރިއާ ގުޅިފައިވާ ފައިސާ (petty cash) ހުރިނަމަ، އެވެސް ވިޔަފާރި މުދަލުގެ އަގުގެ ތެރެއަށް އިތުރުކުރާނީއެވެ. އަދި ހަމަ އެފަދައިން މީސްތަކުންނަށް މުދާ ދަރަންޏަށް ދޫކޮށްފައިވާނަމަ، އޭގެ ތެރެއިން ލިބޭނެކަމަށް އުންމީދުކުރާ ބައިވެސް އެއަށް އިތުރު ކުރާނީއެވެ. އަދި އެ ހުރިހާ އެއްޗެއް އެއްކުރުމަށް ފަހު އަންނަ ޖުމްލަ އަގުގެ 40 ބައިކޮށްފައި އެއްބައި (އެބަހީ: 2.5 %) ނެރޭނީއެވެ.
މުދާތައް މިގޮތަށް އަގުކުރާއިރުގައި ވިޔަފާރިވެރިޔާ އިންވެސްޓުކުރި ފައިސާއަށް ބަލާކަށް ނުޖެހޭނެއެވެ.
މިސާލަކަށް:
އަހަރު ނިމޭއިރުގައި މީހަކު އޭނާ ވިއްކަން ގެންގުޅޭ ތަކެތި އަގުކުރިއެވެ. އެއީ އޭނާ އެއެއްޗެހި ވިއްކާ އަގަށް ބަލައިގެންނެވެ. އޭގެ އަގަކީ 370536 ރުފިޔާއެވެ. އެހެންކަމުން އޭގެ2.5 % އަކީ: 9263.4 ރުފިޔާއެވެ. އޭނާ ޒަކާތުގެ ގޮތުގައި އެއިން ނެރެންޖެހޭނެ މިންވަރަކީ 9263.4 ރުފިޔާއެވެ.
އަދި އެ ވިޔަފާރީން އެމީހަކަށް ލިބިފައިފާ ފައިދާ ހިޖުރީ އަހަރެއް ނިމެންދެން އޭނާގެ އަތުގައި ހުރިނަމަ އޭގެންވެސް 2.5 % ނެރޭނީއެވެ. އަދި އެ އަހަރުގެ ތެރޭގައި އޭނާ އެ އެއްކޮށް ހޭދަކޮށްފައިވާނަމަ ނުވަތަ އޭގެ ބައެއް ހޭދަކޮށްފައިވާނަމަ ޒަކާތް ނެރުން ލާޒިމުވާނީ އަހަރު ނިމޭ އިރުގައި އޭނާގެ އަތުގައި ހުރި އެއްޗަކުންނެވެ.
ޚުލާޞާއަކީ: ވިޔަފާރި މުދަލުން ޒަކާތް ނެރޭނެ ގޮތަކީ
(އަހަރު ނިމޭއިރުގައި އަތުގައި ހުރި ވިޔަފާރިއާ ގުޅިފައިވާ ފައިސާ (petty cash) + އަހަރު ނިމޭއިރުގައި ވިޔަފާރީގެ މުދަލުގެ އަގުކުރުން އަރާ މިންވަރު (އަގުކުރާނީ އޭނާ މުދާ ވިއްކާ އަގަށް) + އޭނާއަށް ލިބޭނެކަމަށް އުންމީދުކުރެވޭ ދަރަނި + އަހަރު ނިމުނު އިރު އެ ވިޔަފާރިން ލިބިފައިވާ ފައިދާގެ ބާކީ ހުރި ވަރު) ÷ 40
ވިޔަފާރިވެރިޔާ ނަގާފައިވާ ދަރަނިތައް މިއިން އުނިކުރާކަށް ނުޖެހޭނެއެވެ.
والله أعلم .
_________________________
