ދަރިންނަށްޓަކައި ކުރެވިދާނެ ބައެއް ދުޢާތައް

އެހެންކަމުން ، ދަރީންދެކެ ރުޅި އައިސްގެންވެސް ނުވަތަ ހިތްހަމަ ނުޖެހިގެން ކަމުގައި ވިޔަސް އެކުދިންނަށްޓަކައި ނުބައި ދުޢާއެއް ނުކުރާށެވެ. ބަދުބަހެއްވިޔަސް ނުބުނާށެވެ. އަދި އެފަދަކަމެއް ދިމާވެދާނެކަމާއި މެދު ހުޝިޔާރުވެ ތިބޭށެވެ. އެހެނީ މައިންބަފައިން ދަރީންނަށްޓަކައި ކުރާ ދުޢާއަކީ ، ޝައްކެއްވެސް ނެއްގޮތުގައި އިޖާބަކުރެވޭ ދުޢާއެއް ކަމުގައި ރަސޫލުﷲ ޞައްލައްﷲ ޢަލައިހި ވަސައްލަމަ އެވަނީ ބަޔާންކޮށްދެއްވާފައެވެ. އަޅުގަނޑުމެންނަށް އެކަށީގެންވަނީ އެކުދިންނަށްޓަކައި ހެޔޮ ރަނގަޅު ދުޢާ ކުރުމެވެ. ދުނިޔެއާއި އާޚިރަތުގައިވެސް ބާއްޖަވެރި ބަޔަކަށް އެކުދިން ވޭތޯ ދުޢާކުރުމެވެ. އެގޮތުން ، ކީރިތި ޤުރުއާންގައި ވާރިދުވެފައިވާ ، ދަރިންނަށްޓަކައި ކުރެވިދާނެ ބައެއް ދުޢާތައް ބަޔާންކޮށްދެވޭތޯ ބަލާނަމެވެ.

1 – (( رَ‌بَّنَا هَبْ لَنَا مِنْ أَزْوَاجِنَا وَذُرِّ‌يَّاتِنَا قُرَّ‌ةَ أَعْيُنٍ وَاجْعَلْنَا لِلْمُتَّقِينَ إِمَامًا)) ﴿٧٤﴾  سورة الفرقان

މާނަ : ” އޭ އަޅަމެންގެ ވެރި ރައްބު! އަޅަމެންގެ އަނބިންގެ ކިބައިންނާއި ދަރީންގެ ކިބައިން ލޮލައް ފިނިކަން ލިބުމެއް އަޅަމެންނަށް ދެއްވާފާނދެއެވެ! އަދި އަޅަމެންނަކީ ތަޤުވާވެރިންނަށް މަގުދައްކާ އިމާމުން ކަމުގައި ލައްވާފާނދެއެވެ! “

2 – (( رَ‌بِّ هَبْ لِي مِن لَّدُنكَ ذُرِّ‌يَّةً طَيِّبَةً ۖ إِنَّكَ سَمِيعُ الدُّعَاءِ )) ﴿٣٨﴾  سورة آل عمران

މާނަ : ” އަޅުގެ ވެރިރަސްކަލާކޯއެވެ! އިބަރަސްކަލާނގެ ޙަޟްރަތުން، ހެޔޮލަފާ ރަނގަޅު ދަރިފަސްކޮޅެއް މިއަޅާއަށް ދެއްވާނދޭވެ! ހަމަކަށަވަރުން، އިބަރަސްކަލާނގެއީ، ގިނަގިނައިން ދުޢާ އައްސަވާވޮޑިގެންވާ ރަސްކަލާނގެއެވެ. “

3 – (( رَ‌بِّ نَجِّنِي وَأَهْلِي مِمَّا يَعْمَلُونَ )) ﴿١٦٩﴾  سورة الشعراء

މާނަ :” އަޅުގެ ވެރިރަސްކަލާކޮ! އެއުރެންކުރާ (ފާޙިޝް ނުބައި ) ޢަމަލުން މިއަޅާއާއި މިއަޅާގެ އަހުލުވެރިން ސަލާމަތް ކުރައްވާނދޭވެ! “

4 – (( رَ‌بِّ أَوْزِعْنِي أَنْ أَشْكُرَ‌ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْ‌ضَاهُ وَأَصْلِحْ لِي فِي ذُرِّ‌يَّتِي ۖ إِنِّي تُبْتُ إِلَيْكَ وَإِنِّي مِنَ الْمُسْلِمِينَ )) ﴿١٥﴾  سورة الأحقاف

މާނަ : ” އަޅުގެ ވެރިރަސްކަލާކޮ! އިބަރަސްކަލާނގެ މިއަޅާގެ މައްޗަށާއި، މިއަޅާގެ މައިންބަފައިންގެ މައްޗަށް ދެއްވި  ނިޢުމަތަށް ޝުކުރު ކުރުމަށާއި، އިބަރަސްކަލާނގެ ރުހިވޮޑިގެންވާ ޞާލިޙުޢަމަލު ކުރުމަށް މިއަޅާއަށް އިލްހާމު ކުރައްވާނދޭވެ! އަދި މިއަޅާގެ ދަރިފަސްކޮޅު، މިއަޅާއަށްޓަކައި އިޞްލާޙު ކޮށްދެއްވާނދޭވެ! ހަމަކަށަވަރުން، ތިމަންއަޅާ އިބަރަސްކަލާނގެޔަށް ތަވްބާ ވެއްޖައީމެވެ. ހަމަކަށަވަރުން، ތިމަންއަޅާވަނީ މުސްލިމުންގެ ތެރެއިންނެވެ. “

5 – (( رَ‌بِّ اجْعَلْنِي مُقِيمَ الصَّلَاةِ وَمِن ذُرِّ‌يَّتِي ۚ رَ‌بَّنَا وَتَقَبَّلْ دُعَاءِ )) ﴿٤٠﴾ سورة ابراهيم

މާނަ : ” އަޅުގެ ވެރިރަސްކަލާކޮ! މިއަޅާއީ، ނަމާދު ޤާއިމުކޮށްއުޅޭ މީހެއްކަމުގައި ލައްވާނދޭވެ! އަދި އަޅާގެ ދަރިންކުރެންވެސްމެއެވެ. އަޅަމެންގެ ވެރިރަސްކަލާކޮ! އަދި އަޅުގެ ދުޢާ ޤަބޫލު ކުރައްވާނދޭވެ! “

6 – (( وَاجْنُبْنِي وَبَنِيَّ أَن نَّعْبُدَ الْأَصْنَامَ)) ﴿٣٥﴾ سورة ابراهيم

މާނަ: ” އަދި މިއަޅާއާއި، މިއަޅާގެ ދަރިން ބުދަށް އަޅުކަންކުރުމުން ދުރުކުރައްވާނދޭވެ! “

7 – (( رَ‌بِّ هَبْ لِي مِنَ الصَّالِحِينَ )) ﴿١٠٠﴾ سورة الصافات

މާނަ : ” އަޅުގެ ވެރިރަސްކަލާކޮ! މިއަޅާއަށް ޞާލިޙުންގެ ތެރެއިންވާ ދަރިޔަކު ދެއްވާނދޭވެ! “