1-ތަވްޙީދުގެ އަހުލުވެރިޔަކު ނަރަކައިގައި ދެމިނޯންނާނެއެވެ. ޢަޛާބު ޙައްޤުވާކަމަކަށް އަރައިގެންފައިވާނަމަ، އެކަމަކަށް ޢަޛާބުދެއްވުމަށްފަހު، ކޮންމެވެސް ދުވަހަކުން އޭނާ ނަރަކައިން ނެރެވި ސުވަރުގެ ވެއްދޭނެއެވެ.
2-އޭނާގެ ތަވްޙީދު ފުރިހަމަވެއްޖެނަމަ، އެއްގޮތަކަށްވެސް ނަރަކައަށް ނުވެއްދޭ މީހުންގެ ތެރެއިން އޭނާވެގެންދާނެއެވެ. އަދިކިއެއް! އެއްވެސް ޙިސާބަކާނުލައި ސުވަރުގެ ވެއްދޭ މީހުންގެ ތެރެއިންވެސް އޭނާ ވެގެން ހިނގައިދާނެއެވެ.
3-ޤިޔާމަތްދުވަހު، ރަސޫލުﷲ ޞައްލަﷲޢަލައިހިވަސައްލަމަގެ ޝަފާޢަތް ލިބޭ މީހުންގެތެރެއިން އޭނާ ވާނެއެވެ.
4-ފުރިހަމަ ހިދާޔަތު ލިބިގެންވާ މީހުންގެ ތެރެއިން އޭނާ ވާނެއެވެ.
5-އަދި ދުނިޔެއާއި އާޚިރަތުގައިވެސް އޭނާއަށް އަމާންކަން ލިބިގެންދާނެއެވެ.
6-ކުރިމަތިވާ މުޞީބާތްތަކަށް ކެތްތެރިވާ މީހަކުކަމުގައި އޭނާ ވާނެއެވެ. އެހެނީ، ﷲ އެއިލާހުގެ އަޅަކަށް ދެރަގޮތެއް މެދުވެރި ނުކުރައްވާނެކަމާއި، ކޮންމެ ކަމެއްގައިވެސް ހެވެއް ވާނެކަން އޭނާ ޤަބޫލުކުރާނެއެވެ.
7-ފާފަވެރިންނަށް ދުނިޔެއާއި އާޚިރަތުގައިވެސް އޮތީ ގެއްލުމާއިހަލާކުކަން އޭނާގެ ހަނދާންނުން ފޮހެވިގެން ނުދާނެއެވެ. އެހެންކަމުން، ފާފަތަކާއި އެންމެހާ މުންކަރާތްތަކުން ދުރިހެލިވާން ގަދައަޅައި މަސައްކަތްކުރާ މީހަކުކަމުގައި އޭނާ ވާނެއެވެ.
8-މުޞީބާތެއް ކުރިމަތިވެއްޖެނަމަ، އެކަމުން އެންމެއަވަހަށް ސަލާމަތްވާ މީހުންގެ ތެރެއިން އޭނާ ވެގެންދާނެއެވެ. އެހެނީ އެހެނިހެން މަޚްލޫޤުންގެ އެހީއަށް އެދުމުގެ ބަދަލުގައި އޭނާ އެހީއަށް އެދިދަންނަވާނީ އެންމެހައި މަޚްލޫޤުންގެ ވެރިއިލާހަށެވެ.
9-ހިތްހަމަޖެހޭ އުފާވެރި ދިރުއުޅުމެއްލިބިގެންވާ މީހަކުކަމުގައި އޭނާވާނެއެވެ.
އަދި މިނޫންވެސް އެތައްތައް ފައިދާތަކެއް ތަވްޙީދުން ލިއްބައިދެއެވެ. މިފައިދާތައް އިތުރުވުމާއި މަދުވުން ބިނާވެގެންވަނީ އޭނާ ތަވްޙީދުގައި ހިފަހައްޓާ މިންވަރަކަށެވެ.
