އަލްޚަލީލް (އެބަހީ: އިބްރާހީމް ގެފާނު) عليه السلام ވިދާޅުވިއެވެ.
﴿وَاجْنُبْنِي وَبَنِيَّ أَنْ نَعْبُدَ الْأَصْنَامَ﴾ [سورة إبراهيم 35]
މާނައީ: “އަދި އަޅާ އާއި އަޅުގެ ދަރިން ބުދަށް އަޅުކަންކުރުމުން ދުރުކުރަންވާނދޭވެ.”
ސުވާލު 4: – އަލްޚަލީލަކީ ކޮބައި ހެއްޔެވެ؟
– އަދި اﻷصنام އަކީ ކޮބައި ހެއްޔެވެ؟
– އަދި މިއާޔަތް ޝަރަޙަ ކޮށްދޭށެވެ.
– އަދި މި އާޔަތް މިބާބާ (ﷲ އަށް ޝަރީކުކުރުމަށް ބިރުވެތިވުން ނަންގަތް ބާބާ) މުނާސިބުވަނީ ކިހިނެއްކަން ބަޔާންކޮށްދޭށެވެ.
ޖަވާބު: – الخليل އަކީ މީހެއްގެ ހިތުގައި، ވަކި ފަރާތަކަށްޓަކައި ވަރަށް ބޮޑަށް ލޯބި އޮންނަ މީހާއެވެ. الخليل މި ބަސް ނެގިފައިވަނީ الخلة އިންނެވެ. الخلة އަކީ ޚާލިޞް ލޯތްބެވެ.
– اﻷصنام އަކީ صنم ގެ ގިނަގޮތެވެ. ސިފައަކަށް ނުވަތަ ސޫރައަކަށް ހެދިފައި ހުންނަ، ﷲ ފިޔަވާ އެތަކެއްޗަށް އަޅުކަން ކުރެވޭ ތަކެއްޗެވެ. އަދި ބުނެވެއެވެ. ވަކި ސިފައަކަށް ނުވަތަ ސޫރައަކަށް ހެދިފައި ނެތް ނަމަވެސް، ﷲ ފިޔަވާ އެތަކެއްޗަށް އަޅުކަން ކުރެވޭ ކޮންމެ އެއްޗަކީ اﻷصنام އެވެ.
– މިއާޔަތުގެ ޝަރަޙަ: ތިމަންކަލޭގެފާނާއި، ތިމަންކަލޭގެފާނުގެ ދަރިން، ބުދަށް އަޅުކަންކުރުމުން އެއްފަރާތް ކުރައްވާ ދުރުކުރައްވާނދޭވެ!
– މި އާޔަތް މިބާބާ (ﷲ އަށް ޝަރީކުކުރުމަށް ބިރުވެތިވުން ނަންގަތް ބާބާ) މުނާސިބުވާގޮތް: އިބްރާހީމްގެފާނަކީ ރަޙްމާންވަންތަ އިލާހުގެ ޚަލީލުކަމުގައި ވީހިނދު އެކަލޭގެފާނުގެ އަތްޕުޅުން އެބުދުތައް ތަޅާލެއްވިއެވެ. އެއީ އެކަލޭގެފާނާއި، އެކަލޭގެފާނުގެ ދަރިން ބުދުތަކުގެ ފިތުނައިގެ ސަބަބުން، ﷲ އަށް ޝަރީކުކުރެވިދާނެ ކަމުގެ ބިރަށްޓަކައެވެ. އަދި ﷲ ގެ ޙަޟްރަތުގައި އެކަލޭގެފާނާއި އެކަލޭގެފާނުގެ ދަރިން ބުދަށް އަޅުކަންކުރުމުން ސަލާމަތްކޮށްދެއްވުން އެދި ދުޢާކުރެއްވިއެވެ. ފަހެ، އަހަރެމެން، އަހަރެމެންގެ އީމާންތެރިކަން ބަލިކަށިކަމުގައިވާޙާލު ޝިރުކަށް އަރައިގަނެވިދާނެކަމަށް ބިރުވެތިވުން އައުލާވެގެންވެއެވެ.
ނޯޓް: މިތަނުގައި އިބްރާހީމް عليه السلام ޚަލީލެއް ގޮތުގައި ބަޔާންކުރައްވާފައިވަނީ ﷲ ތަޢާލާ އިބްރާހީމް عليه السلام ޚަލީލެއް ގޮތުގައި ޚިޔާރުކުރައްވާފައި ވާތީއެވެ. އެކަލާނގެ ވަޙީކުރައްވާފައި ވެއެވެ.
﴿وَاتَّخَذَ اللَّهُ إِبْرَاهِيمَ خَلِيلًا﴾ [سورة النساء 125]
މާނައީ: “ﷲ، ޚަލީލަކު ކަމުގައި އިބްރާހީމް ގެފާނު ހިއްޕެވިއެވެ.”
* * * *
– އަލްޖާމިޢުލް ފަރީދް (ޝައިޚް ޢަބްދު ﷲ ބުން ޖާރު ﷲ ބުން އިބްރާހީމް އަލް ޖާރު ﷲ) –
މިފޮތަކީ ސުވާލާއި ޖަވާބުގެ އުސްލޫބަށް ކިތާބުއްތައުޙީދު ކިޔަވާ ދިނުމަށް ތައްޔާރުކުރެވިފައިވާ ފޮތެކެވެ.
