ޖަނާޒާގެ ޙުކުމްތައް ނަންގަތް ބާބު
﴿اسْتَغْفِرْ لَهُمْ أَوْ لَا تَسْتَغْفِرْ لَهُمْ إِن تَسْتَغْفِرْ لَهُمْ سَبْعِينَ مَرَّةً فَلَن يَغْفِرَ اللَّـهُ لَهُمْ﴾ [سورة التوبة 80]
މާނައީ: “އެބައިމީހުންނަށް (އެބަހީ: މުނާފިޤުންނަށް) ފާފަފުއްސެވުމަށް ކަލޭގެފާނު އެދިވަޑައިގަންނަވާށެވެ! ނުވަތަ އެބައިމީހުންނަށް ފާފަފުއްސެވުމަށް ކަލޭގެފާނު އެދިވަޑައިނުގަންނަވާށެވެ! އެބައިމީހުންނަށް ފާފަފުއްސެވުމަށް ހަތްދިހަ ފަހަރު ކަލޭގެފާނު އެދިވަޑައިގަތަސް ﷲ، އެބައިމީހުންނަކަށް ފާފައެއް ނުފުއްސަވާނެއެވެ.”
﴿ وَلَا تُصَلِّ عَلَىٰ أَحَدٍ مِّنْهُم مَّاتَ أَبَدًا وَلَا تَقُمْ عَلَىٰ قَبْرِهِ ۖ إِنَّهُمْ كَفَرُوا بِاللَّـهِ وَرَسُولِهِ وَمَاتُوا وَهُمْ فَاسِقُونَ﴾ [سورة التوبة 84]
މާނައީ: “އެބައިމީހުންގެ (އެބަހީ: މުނާފިޤުންގެ) ތެރެއިން މަރުވި އެއްވެސް މީހެއްގެ މައްޗަށް ކަލޭގެފާނު ދުވަހަކުވެސް ކަށުނަމާދު ނުކުރައްވާށެވެ! އަދި އެމީހެއްގެ މަހާނަދޮށުގައިވެސް ކަލޭގެފާނު ހުއްޓިވަޑައިގެން ނުހުންނަވާށެވެ! ހަމަކަށަވަރުން އެބައިމީހުން ﷲ އަށާއި އެއިލާހުގެ ރަސޫލާއަށް ކާފިރުވިއެވެ. އަދި އެބައިމީހުން މަރުވީ ފާސިޤުން ކަމުގައިވާ ޙާލުގައެވެ.”
