ވަދީޢާގެ ޝަރުޠުތައް
ވަދީޢާ ހުއްދަވުމަށް ދެ ޝަރުޠެއް ފުރިހަމަވާން ޖެހެއެވެ. އެއީ:
- ވަދީޢާއާއި ހަވާލުވާ މީހާ، ވަދީޢާގެ ސަބަބުން އެއްވެސް މަންފާއެއް ޙާޞިލްނުކުރުން. އެއީ ހަދިޔާއެއް ނަމަވެސް ނުވަތަ އަގެއް ނަމަވެސް މެއެވެ. ސަބަބަކީ ވަދީޢާއަކީ ބަދަލެއް ލިބުމަކައި ނުލައި މީހެއްގެ މުދާ ރައްކާތެރިކޮށް ބަލަހައްޓައި ދިނުންކަމަށް ވާތީއެވެ.
- ރިބާގެ މުޢާމަލާތެއް ހިނގާފަދަ ގޮތަކަށް ކުރެވޭ މުޢާމަލާތެއް ކަމުގައި ނުވުން. މިސާލަކަށް ބޭންކުގައި ޖަމާކުރެވޭ ފައިސާއަށް ރިބާގެ ގޮތުގައި އިތުރުވާގޮތަށް ކުރެވިފައި ހުންނަ މުޢާމަލާތްތައް ފަދަ މުޢާމަލާތެއްކަމުގައި ވެގެން ނުވާނެއެވެ.
ވަދީޢާގެ ޢަޤުދުގެ ޙުކުމް:
މިޢަޤުދަކީ ހުއްދަ ޢަޤުދެކެވެ. ދެފަރާތުން ކުރެ ކޮންމެ ފަރާތަކަށްވެސް މިޢަޤުދު އުވާލުމުގެ ބާރު ވެއެވެ. އިބްނު ޖުޒައްޔު ވިދާޅުވެފައިވެއެވެ: ” އެއީ ދެފަރާތުގެ ދެމެދުގައިވާ އަމާނާތެކެވެ. ދެމީހުންކުރެ ކޮންމެ މީހަކަށްވެސް މިޢަޤުދު ބޭނުން ވަޤުތެއްގައި އުވާލެވިދާނެއެވެ.” [1]
= ނުނިމޭ =
________________
މިލިޔުމުގެ އެހެނިހެން ބައިތައް
[1] އަލްޤަވާނީން އަލްފިޤްހިއްޔާ، ޞަފްޙާ 246.
