ނިފާޤުގެ ދެވައްތަރެއްވެއެވެ. އެއީ: އިޢުތިޤާދުގެ ނިފާޤާއި ޢަމަލުގެ ނިފާޤެވެ.
ފުރަތަމައީ: އިޢުތިޤާދުގެ ނިފާޤުގެ 6 ބާވަތެއްވެއެވެ.
- ރަސޫލާ صلى الله عليه وسلم ދޮގުކުރުން.
- ރަސޫލާ صلى الله عليه وسلم ގެންނެވި ބައެއް ކަންތައްތައް ދޮގުކުރުން.
- ރަސޫލާ صلى الله عليه وسلم ދެކެ ރުޅިއައުން.
- ރަސޫލާ صلى الله عليه وسلم ގެންނެވި ބައެއް ކަންތައްތައް ދެކެ ރުޅިއައުން.
- އިސްލާމްދީނަށް ނިކަމެތިވާފަދަ ކަމެއް މެދުވެރިވުމުން އެކަމާ އުފާކުރުން.
- އިސްލާމްދީނަށް ނަޞްރުލިބޭފަދަ ކަމެއް މެދުވެރިވުމުން އެކަމާ ނުރުހުންތެރިވުން.
މިފަދަ ކަމެއް އެމީހެއްގެ ކިބައިގައިވާ މީހަކީ ނަރަކައިގެ އެންމެ ދަށުދަރަޖައިގައި ވާނޭ މީހުންގެ ތެރެއިން މީހެކެވެ.
ދެވަނައީ: ޢަމަލީ ނިފާޤުގެ 5 ބާވަތެއްވެއެވެ.
- ވާހަކައެއް ދައްކައިފިއްޔާ ދޮގުހެދުން.
- އަރައިރުމެއްވެއްޖެއްޔާ ހުތުރު އެއްޗެހި ގޮވުން.
- ޢަހުދެއްކޮށްފިއްޔާ އެއަށް ޣައްދާރުވުން.
- އަމާނަތެއް ހަވާލުކޮށްފިއްޔާ އެއަށް ޚިޔާނާތްތެރިވުން.
- ވަޢުދެއްވެއްޖެއްޔާ އެއާ ޚިލާފުވުން.
އެކަމުގެ ދަލީލަކީ ނަބިއްޔާ صلى الله عليه وسلم ގެ ޙަދީޘްފުޅެވެ. އެކަލޭގެފާނު ޙަދީޘްކުރެއްވިއެވެ.
((آيَةُ المُنَافِقِ ثَلاَثٌ: إِذَا حَدَّثَ كَذَبَ، وَإِذَا وَعَدَ أَخْلَفَ، وَإِذَا اؤْتُمِنَ خَانَ)) [رواه البخاري في صحيحه برقم: (33)]
މާނައީ: “މުނާފިޤުންގެ ތިން ޢަލާމާތެއްވެއެވެ. ވާހަކައެއް ދައްކައިފިއްޔާ ދޮގުހަދާނެއެވެ. އަދި ވަޢުދެއްވެއްޖެއްޔާ އެއާ ޚިލާފުވާނެއެވެ. އަދި އަމާނާތެއް ހަވާލުކޮށްފިއްޔާ އެއަށް ޚިޔާނާތްތެރިވާނެއެވެ.”
އަދި އެހެން ޙަދީޘެއްގައިވެއެވެ.
((وَإِذَا عَاهَدَ غَدَرَ، وَإِذَا خَاصَمَ فَجَرَ)) [رواه البخاري في صحيحه برقم: (34)]
މާނައީ: “އަދި ޢަހުދެއްވެއްޖެއްޔާ އެއާ ޚިލާފުވާނެއެވެ. އަދި އަރާރުމެއްވެއްޖެއްޔާ ހުތުރު އެއްޗެހި ގޮވާނެއެވެ.”
ފިލާވަޅުގެ އިރުޝާދުތައް
* ނިފާޤުކަމަކީ ކުފުރާއި މުއުމިނުންނަށް އޮޅުވާލުމާ، މިދެ ނުބައިކަން އެއްކުރާ ކަމެކެވެ. އެހެންކަމުން ﷲ ތަޢާލާ އެފަދަ މީހުންނަށް ގަދަފަދަ ވެގެންވާ ޢުޤޫބާތް ދެއްވައެވެ. ﷲ ތަޢާލާ ވަޙީކުރެއްވިއެވެ.
﴿إِنَّ الْمُنَافِقِينَ فِي الدَّرْكِ الْأَسْفَلِ مِنَ النَّارِ وَلَن تَجِدَ لَهُمْ نَصِيرًا﴾ [سورة النساء ١٤٥]
މާނައީ: “ހަމަކަށަވަރުން، މުނާފިޤުން ވާހުށީ، ނަރަކައިގެ އެންމެ ދަށުވަތްގަނޑުގައެވެ. އަދި އެއުރެންނަށް ނަޞްރުވެރިވާނޭ އެއްވެސް ފަރާތެއް ކަލޭގެފާނު ދެކެވަޑައެއް ނުގަންނަވާނެއެވެ.”
* އިޢުތިޤާދީ ނިފާޤަށް ވެއްޓޭ މީހުންކުރާ ބައެއް ކަންތައްތަކުގެ ތެރޭގައި:
– ނަބިއްޔާ صلى الله عليه وسلم ގެންނެވި ކަންތައްތައް ދޮގުކުރުން.
މިޘާލަކަށް: އާދަމުގެފާނު ޚަލްޤުކުރެއްވުނީ މަށިންކަމާއި ޙައްވާގެފާނު ޚަލްޤުކުރެއްވުނީ އެކަލޭގެފާނުގެ އަރިކަށިންކަމާއި މުޙައްމަދު އަކީ އެންމެ ފަހުގެ ނަބިއްޔާ އަދި ރަސޫލާކަމެވެ. މުސްލިމެއްކަމުގައި ދަޢުވާކުރާ ޙާލުވެސް އެފަދައިން ދީނުގައި ބަޔާންވެގެންވާ ކަންތައްތައް އިންކާރުކުރާ މީހުންވާނީ މުނާފިޤުންނަށެވެ.
– ނަބިއްޔާ صلى الله عليه وسلم ގެންނެވި ކަންތައްތަކުގެ ތެރެއިން ބައެއް ކަންތައްތަކަށް އިންކާރުކުރުން.
މިޘާލަކަށް: ރާބުއިން ޙަރާމްކޮށްފައިވާތީ އެކަމާ ނުރުހުންތެރިވުމާއި ނަމާދަށް ނަފުރަތުކުރުމާއި ނަމާދަށް ފުރައްސާރަކުރުމެވެ.
– އިސްލާމީ ޝަރީޢަތަށް ޢަމަލުނުކުރާތީ އެކަމާ އުފާކުރުމާއި އިސްލާމްދީނާއި މުސްލިމުންނަށް ނަޞްރު ލިބުމަށް ނޭދުން.
* ޢަމަލީ ނިފާޤުގެ ކަމެއް މުސްލިމަކު ކޮށްފިނަމަ (މިޘާލަކަށް: ދޮގުހެދުމާއި ޣައްދާރުވުން) ފަހެ އެފަދަ މީހަކު އިސްލާމްދީނުން ބޭރެއް ނުވާނެއެވެ. އެހެނަސް އޭނާއަށް އެ އަރައިގަނެވެނީ ވަރަށް ބޮޑު ފާފައަކަށެވެ. އޭގެ ސަބަބުން އޭނާ އިޢުތިޤާދުގެ ނިފާޤަށް ވެއްޓިދާނެކަމުގެ ބިރު އޮންނާނެއެވެ.
* އިޢުތިޤާދުގެ ނިފާޤަށް އަރައިގަންނަ މީހުން އިސްލާމްދީނުގެ މިއްލަތުން ބޭރުވާނެއެވެ. އަދި ޢަމަލީ ނިފާޤަށް އަރައިގަންނަ މީހުން އިސްލާމްދީނުގެ މިއްލަތުން ބޭރެއް ނުވާނެއެވެ.
ސުވާލުތައް
- މުނާފިޤުންނަށް ގަދަފަދަވެގެންވާ ޢުޤޫބާތް ލިބެނީ ކީއްވެ ހެއްޔެވެ؟
- އިޢުތިޤާދުގެ ނިފާޤުގެ ވައްތަރުތައް ބަޔާންކުރާށެވެ.
- މުނާފިޤުންގެ ނިމުން ބަޔާންކޮށްދޭ ޤުރުއާނުގެ ދަލީލެއް ލިޔާށެވެ.
- އިޢުތިޤާދީ ނިފާޤަށް ވެއްޓޭ މީހުންކުރާ ބައެއް ކަންތައްތައް ލިޔާށެވެ.
- ޙަދީޘްފުޅުގައި ބަޔާންކުރައްވާފައިވާ މުނާފިޤުކަމުގެ ޢަލާމާތްތައް ބަޔާންކުރާށެވެ.
- އިޢުތިޤާދުގެ ނިފާޤާއި ޢަމަލުގެ ނިފާޤުގެ ތަފާތު ބަޔާންކުރާށެވެ.
= ނުނިމޭ =
_____________________________
