عَنْ عَائِشَةَ رَضِيَ الله عَنْهَا قَالَتْ : ((كَانَ النَّبِيُّ صَلَّى اللهُ عَلَيْهِ وَسَلَّمَ يُعْجِبُهُ التَّيَمُّنَ فِي تَنَعُّلِهِ وَتَرَجُّلِهِ وَطُهُوْرِهِ وَفِي شَأْنِهِ كُلِّهِ)) (متفق عليه)
މިޙަދީޘްގެ މާނަޔަކީ:
ޢާއިޝަތުގެފާނު رَضِيَ الله عَنْهَا ވިދާޅުވިއެވެ. “މާތް ނަބިއްޔާ صلّى الله عليه وسلّم ޠަހާރަތުގެ ކަންކަމުގަޔާއި، ފުނާއެޅުއްވުމުގަޔާއި، ފައިވާންޖޯޑުކޮޅައް އަރައިވަޑައިގަތުމުގަޔާއި، އަދިވެސް އެހެނިހެން ހުރިހާކަމެއްގައި ކަނާއަތް އިސްކުރެއްވުމަށް ލޯބިކުރެއްވިއެވެ.”
މިޙަދީޘް ރިވާކުރައްވާފައިވަނީ އިމާމް ބުޚާރީއާއި އިމާމް މުސްލިމެވެ.
ނޯޓް: މިގޮތަށް ކަނާއަތް އިސްކުރެއްވީ ރިވެތި ކަންކަމުގައެވެ. އެހެނިހެން ކަންކަމުގައި ވާއަތް އިސްކުރުމަކީ މުސްތަޙައްބު ކަމެކެވެ. މިސާލަކަށް ފާޚާނާއަށް ވަނުމުގައި ވާއަތް އިސްކުރުމެވެ.
މިޙަދީޘުންލިބޭ ބައެއްފައިދާ:
– ރިވެތިކަންކަން ކުރުމަށް ކަނާއަތް އިސްކުރުމަކީ މުސްތަޙައްބު ކަމެއްކަން.
– ކީރިތި ރަސޫލާ ޞައްލަﷲ ޢަލައިހި ވަސައްލަމަ ރިވެރި ކަންކަމަށް ލޯބިކުރައްވާކަން.
