އަލްބައްޔިނާގެ މާނައެވަނީ ޖެހިގެން އޮތް އާޔަތުގައެވެ.
﴿ رَسُولٌ مِّنَ اللَّهِ ﴾
މާނައީ: “(އެ ދަލީލަކީ) ﷲގެ ޙަޟްރަތުން ފޮނުއްވެވި ރަސޫލެކެވެ.”
އެ ރަސޫލަކީ ނަބިއްޔާ صلى الله عليه وسلّم އެވެ. އެއީ މުޙައްމަދު ރަސޫލު ﷲ އެވެ. އެއީ ޢަބްދުﷲ ގެ ދަރިކަލުންނެވެ. ނިސްބަތްވެވަޑައިގަންނަވަނީ ޤުރައިޝުންގެ ހާޝިމުވަންހައަށެވެ. މިއާޔަތުގައި ޢަރަބިބަހުގެ އުސްލޫބެއްކަމުގައިވާ “ނަކިރާ”ކޮށް ﴿ رَسُولٌ ﴾ އައިސްފައިވަނީ މަތިވެރިކުރެއްވުމުގެ ގޮތުންނެވެ. އެހެނީ އެއީ މަތިވެރިކުރުން ޙައްޤު ފަރާތެކެވެ. އަދި އެކަލޭގެފާނާމެދު އަދަބުކުޑަކުރުމާއި ޙައްދުފަހަނައަޅައި ދިޔުމުން ދުރުހެލިވާން ޖެހޭނެއެވެ. ﷲ ތަޢާލާ އެކަލޭގެފާނު ރަސޫލެއްގެ ގޮތުގައި ފޮނުއްވީ އެންމެހާ ޢާލަމްތަކަށް ހެޔޮ ޚަބަރުދެއްވާ އަދި އިންޛާރުކުރައްވާ ބޭކަލެއްގެ ގޮތުގައެވެ.
ﷲ ތަޢާލާ ވަޙީކުރެއްވިއެވެ.
﴿ وَأَرْسَلْنَاكَ لِلنَّاسِ رَسُولًا﴾ [النساء: 79]
މާނައީ: “ތިމަންއިލާޙު ކަލޭގެފާނު މީސްތަކުންގެ ގާތަށް ފޮނުއްވާފައިވަނީ، ނރަސޫލަކު ކަމުގައެވެ. “
އަދިވެސް ވަޙީކުރެއްވިއެވެ.
﴿ تَبَارَكَ الَّذِي نَزَّلَ الْفُرْقَانَ عَلَىٰ عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]
މާނައީ: “ޢާލަމުތަކަށް އިންޛާރުކުރައްވާ ބޭކަލަކު ކަމުގައިވުމަށް، އެކަލާނގެ އަޅާއަށް ޤުރުއާން ބާވައިލެއްވި އިލާހު، މަތިވެރިވެވޮޑިގެންފިއެވެ.”
ފަހެ މުޙައްމަދު صلى الله عليه وسلّم ރަސޫލުކަމައިގެން ފޮނުއްވުނީ ﷲ ގެ ޙަޟްރަތުންނެވެ. އަދި އެކަލޭގެފާނުގެ އަރިހަށް ފޮނުއްވުނީ ޖިބްރީލު عليه الصلاة والسلام އެވެ. އެހެނީ ޖިބްރީލުގެފާނަކީ ﷲ ތަޢާލާގެ ރަސޫލުބޭކަލުންގެ އަރިހަށް ފޮނުއްވާ ބޭކަލެކެވެ. އެކަލޭގެފާނާވަނީ ވަޙީ ހަވާލުކުރެވިފައެވެ. އެއިލާހު އިރާދަކުރެއްވި އަޅެއްގެ ގާތަށް އެވަޙީއާއިގެން އެކަލޭގެފާނު ވަޑައިގަންނަވައެވެ.
﴿يَتْلُو صُحُفاً مُّطَهَّرَةً ﴾
މާނައީ: ” ޠާހިރުކުރައްވާފައިވާ ފަތްފުށްތަކެއް އެ ރަސޫލާ ކިޔަވައިދެއްވަތެވެ. “
އެބަހީ: އެބޭކަލެއް އެފަތްފުށްތައް މީސްތަކުންނަށް ކިޔައިދެއްވަތެވެ. މިތަނުގައިވާ ﴿ صُحُفاً ﴾ އަކީ صحيفة ގެ ގިނަ ގޮތެވެ. އެއީ ކަރުދާސް ނުވަތަ ލަކުޑިން ހެދިފައި ހުންނަ ފަތްފުށްތަކެވެ. ނުވަތަ އެނޫނަސް ލިޔުމަށް ބޭނުންކުރާ ތަކެއްޗެވެ.
﴿ مُّطَهَّرَةً ﴾ ގެ މުރާދަކީ ޝިރުކުން ޠާހިރުކުރެވިފައިވުމެވެ. އަދި ނުބައި ޚުލުޤުތަކުންވެސްމެއެވެ. އަދި އެނޫނަސް ހުތުރުކަން ބޮޑެތި އެންމެހާ ކަންކަމުންނެވެ. އެހެނީ އެއީ ނަޒާހާތްތެރި މުޤައްދަސް އެއްޗެކެވެ.
= ނުނިމޭ =
_________________________
މިއީ ފަޟީލަތުއްޝައިޚް މުޙައްމަދު ބުން ޞާލިޙް އަލްޢުޘައިމީން رحمه الله ލިޔުއްވާފައިވާ سورة البينة ގެ ތަފްސީރުގެ ތަރުޖަމާއެވެ.
