ރަސޫލުﷲ صلى الله عليه وسلم ޙަދީޘްކުރެއްވިއެވެ.
«إِنَّ الشَّمْسَ وَالقَمَرَ آيَتَانِ مِنْ آيَاتِ اللَّهِ، لاَ يَنْكَسِفَانِ لِمَوْتِ أَحَدٍ وَلاَ لِحَيَاتِهِ، فَإِذَا رَأَيْتُمُوهُمَا، فَادْعُوا اللَّهَ وَصَلُّوا حَتَّى يَنْجَلِيَ» [رواه البخاري / كتاب: الكسوف / باب: دعاء في الخسوف / رقم: 1060]
މާނައީ: “ހަމަކަށަވަރުން އިރާއި ހަނދަކީ ﷲގެ އާޔަތްތަކުގެ ތެރެއިން ދެއާޔަތެވެ. (އެބަހީ: އެއިލާހުގެ ކުޅަދުންވަންތަކަމުގެ ހެކިތަކުގެ ތެރެއިން ދެ ހެއްކެވެ.) ކޭތަހިފަނީ މީހަކު މަރުވުމަކުން ނުވަތަ މީހަކު އުފަންވުމަކުން ނޫނެވެ. ފަހެ، ތިޔަބައިމީހުންނަށް ކޭތަ ފެނުމުން، ކޭތަ ވީއްލަންދެން ﷲ އަށް ދުޢާކޮށް، ނަމާދު ކުރާށެވެ.”
ކޭތަ ނަމާދުގެ ޙުކުމް
ޖުމްހޫރު ޢިލްމުވެރިން ދެކެވަޑައިގަންނަވާ ގޮތުގައި ކޭތަ ނަމާދުކުރުމަކީ ގަދަވެގެންވާ ސުންނަތެކެވެ.
ކޭތަ ނަމާދު ކުރާގޮތް
* ފުރަތަމަ، اللهُ أكبَرُ ކިޔާ ހަށަންބަނުމަށްފަހު ދުޢާއުލް އިސްތިފްތާޙު ކިޔާނީއެވެ. އެއަށްފަހު، ސޫރަތުލް ފާތިޙާ ކިޔަވާނީއެވެ. ދެން ދިގުކޮށް ޤުރުއާން ކިޔަވާނީއެވެ.
* ދެން ރުކޫޢަށް ދާނީއެވެ. ރުކޫޢު ކުރަނީވެސް އާންމު ނަމާދުތަކަށްވުރެ ދިގުކޮށެވެ.
* ދެން ރުކޫޢުން ތެދުވެ سَمِعَ اللهُ لِمَنْ حَمِدَهُ، رَبَّنَا وَلَكَ الْحَمْدُ ކިޔާ ހަށަން ބަންނާނީއެވެ.
* ދެން އަނެއްކާވެސް ސޫރަތުލް ފާތިޙާ ކިޔަވާނީއެވެ. ދެން ދިގުކޮށް ޤުރުއާން ކިޔަވާނީއެވެ. ނަމަވެސް ފުރަތަމަ ރަކުޢަތަށްވުރެ ކުރުކޮށެވެ.
* ދެން އަނެއްކާވެސް ރުކޫޢަށް ދާނީއެވެ. ރުކޫޢު ކުރަނީވެސް އާންމު ނަމާދުތަކަށްވުރެ ދިގުކޮށެވެ. ނަމަވެސް ފުރަތަމަ ރަކުޢަތަށްވުރެ ކުރުކޮށެވެ.
* ދެން އަނެއްކާވެސް ރުކޫޢުން ތެދުވެ سَمِعَ اللهُ لِمَنْ حَمِدَهُ، رَبَّنَا وَلَكَ الْحَمْدُ ކިޔާނީއެވެ. އަދި ރުކޫޢުން ތެދުވެ ކޮޅަށް ހުންނާނީ އާންމު ނަމާދުތަކަށްވުރެ ދިގުކޮށެވެ.
* ދެން ދެސަޖިދަ ކުރާނީއެވެ. ސަޖިދަވެސް ކުރާނީ ދިގުކޮށެވެ. އަދި ދެސަޖިދަ ދެމެދު އިންނައިރުވެސް އިންނަނީ ދިގުކޮށެވެ.
* ދެން ދެވަނަ ރަކުޢަތަށް ތެދުވާނީއެވެ. ދެވަނަ ރަކުޢަތްވެސް ކުރާނީ ފުރަތަމަ ރަކުޢަތް ކުރިގޮތަށެވެ. ނަމަވެސް ފުރަތަމަ ރަކުޢަތަށްވުރެ ކުރުކޮށެވެ.
* ދެން ދެސަޖިދައަށްފަހު، އައްތަޙިއްޔާތު ކިޔާ ސަލާމްދޭނީއެވެ.
– ކޭތަ ނަމާދު ކުރާނީ ޖަމާޢަތުގައެވެ.
– ކޭތަ ނަމާދުގައި އިމާމު މީހާ ކިޔަވާނީ އަޑުހަރުކޮށެވެ.
– ކޭތަ ނަމާދު ނިމުމުން ޚުޠުބާއެއް ދިނުމަށް ސަލަފުން ގިނަ ބޭކަލުން ބުރަވެވަޑައިގެންފައިވެއެވެ.
– ކޭތަ ނަމާދުގައި ދިގުކޮށް ކިޔެވުމަކީ ސުންނަތެކެވެ. އެގޮތުން ވަކި ސޫރަތެއް ކަނޑައެޅިފައެއް ނެތެވެ. އެހެނަސް ބަޤަރާ ސޫރަތް ފަދަ ދިގު ސޫރަތެއް ކިޔުން އެދެވިގެންވެއެވެ.
_________________
