ސުވާލު 1:
– ރޮދި އަދި ބޮޅުފަދަ ތަކެތީގެ މަޤްޞަދަކީ (އެބަހީ: މުރާދަކީ) ކޮބާ ހެއްޔެވެ؟
– މުޞީބާތުން ސަލާމަތްވުމާއި މުޞީބާތް ދުރުކުރުމުގެ ތަފާތަކީ ކޮބާ ހެއްޔެވެ؟
– އަދި މުޞީބާތް ދުރުކުރުމަށާއި މުޞީބާތުން ސަލާމަތްވުމަށްޓަކައި ރޮދި އަދި ބޮޅުފަދަ ތަކެތި އެޅުމުގެ ޙުކުމަކީ ކޮބާ ހެއްޔެވެ؟
ޖަވާބު:
– ބޮޅު: އެއީ ރަތުލޮއިން (copper) ވަށްކޮށް ހަދާފައި ހުންނަ އެއްޗެކެވެ. މުޝްރިކުން އެބައިމީހުންގެ އަތްތަކުގައި އެތަކެތި އަޅާ އުޅުނީ އޭގެ ސަބަބުން އެސްފީނާއާއި ޖިންނީގެ ކިބައިން އަދި އެނޫންވެސް އެފަދަ ކަންކަމުން އެބައިމީހުންނަށް ރައްކާތެރިކަން ލިބޭކަމަށް ދަޢުވާކޮށްގެންނެވެ.
ރޮދި: ޢާންމު ގޮތެއްގައި އެއީ ފަހަން ބޭނުންކުރާ އެއްޗެކެވެ. އެހެނަސް މުޝްރިކުން އެބައިމީހުންގެ އަތްތަކާއި ކަރުތަކުގައި އެތަކެތި އަޅާ އުޅުނީ އޭގެ ސަބަބުން އެބައިމީހުން ހުމުން ދިފާޢުކޮށްދޭ ކަމަށް ދަޢުވާކޮށްގެނެވެ.
– މުޞީބާތުން ސަލާމަތްވުމަކީ (رفع) މުޞީބާތް ޖެހުމަށް ފަހު، އެކަމެއް ފިލުމެވެ. އަދި މުޞީބާތް ދުރުކުރުމަކީ (دفع) މުޞީބާތް ޖެހުމުގެ ކުރިން އެއިން ރައްކާތެރިވުމެވެ.
– އެފަދަ ތަކެތި ބޭނުންކުރުމުގެ ޙުކުމް: މުޞީބާތް ދުރުކޮށްދެނީ ރޮދިފަށް ނުވަތަ ބޮޅުކަމަށް ޤަބޫލުކޮށްފިނަމަ އެއީ ބޮޑު ޝިރުކެވެ. ނަމަވެސް ރޮދިފަށް ނުވަތަ ބޮޅަކީ މުޞީބާތް ދުރުކޮށްދޭ ސަބަބެއްކަމަށް ޤަބޫލުކޮށްފިނަމަ އެއީ ކުޑަ ޝިރުކެވެ. މި ދެ ކަމަކީވެސް (އެބަހީ: މުޞީބާތް ދުރުކުރުމަށް ނުވަތަ މުޞީބާތުން ސަލާމަތްވުމަށްޓަކައި ރޮދިފަށާއި، ބޮޅުފަދަ ތަކެތި ތަވީދުގެ ގޮތުގައި އެޅުމަކީވެސް) ޙަރާމްވެގެންވާ ދެ ކަމެވެ.
* * * *
އަލްޖާމިޢުލް ފަރީދް (ޝައިޚް ޢަބްދު ﷲ ބުން ޖާރު ﷲ ބުން އިބްރާހީމް އަލް ޖާރު ﷲ)
މިފޮތަކީ ސުވާލާއި ޖަވާބުގެ އުސްލޫބަށް ކިތާބުއްތައުޙީދު ކިޔަވާ ދިނުމަށް ތައްޔާރުކުރެވިފައިވާ ފޮތެކެވެ.
