-
ނޫޙުގެފާނުގެ ދަރިކަލުން
ކާފިރުވި މީހުންނާއެކު ނޫޙުގެފާނުގެ ދަރިކަލަކު ވެސް ހިމެނުނެވެ. ނޫޙުގެފާނު ނައުކޮޅުގައި ހުންނަވަނިކޮށް، ތޫފާނުގެ ތެރެއިން އެކަލޭގެފާނު މި ދަރިކަލުން ފެނިވަޑައިގަތެވެ. އެހިނދު ދަރިކަލުންނަށް ގޮވާލެއްވިއެވެ.
(يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ)[1]
މާނަ: “އޭ ދަރިފުޅާއެވެ! ތިމަންމެންނާއެކު (ނާކޮޅަށް) އަރާށެވެ! އަދި ކާފިރުންނާ އެކުގައި ނުވާށެވެ!”
(قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ)[2]
މާނަ: “އެ ދަރިކަލުން ދެންނެވިއެވެ. ފެނުން، ތިމަން ރައްކާތެރިކުރާނޭ ފަރުބަދައަކަށް ތިމަން ދާ ހުށީމެވެ.”
(قَالَ لَا عَاصِمَ الْيَوْمَ مِنْ أَمْرِ اللَّـهِ إِلَّا مَن رَّحِمَ) [3]
މާނަ: “އެކަލޭގެފާނު ވިދާޅުވިއެވެ. اللَّه ގެ އަމުރު ފުޅުން (އެބަހީ: اللَّه ގެ ޢަޛާބުން) ރައްކާތެރިކުރާނޭ ފަރާތެއް، އެކަލާނގެ ރަޙުމަތް ލެއްވި މީހަކަށް މެނުވީ މިއަދަކު ނެތެވެ.”
(وَحَالَ بَيْنَهُمَا الْمَوْجُ فَكَانَ مِنَ الْمُغْرَقِينَ) [4]
މާނަ: “އަދި އެ ދެބަފައިކަލުންގެ ދެމެދުގައި ރާޅު ހުރަސްއެޅިއެވެ. އަދި ޣަރަޤު ކުރެއްވި މީހުންގެ ތެރެއިން، އެ ދަރިކަލުންވިއެވެ.”
ދަރިކަނލުން ޣަރަޤުވީތަން ފެނިވަޑައިގެންނެވުމުން، ނޫޙުގެފާނު ވަރަށް ބޮޑަށް ހިތާމަކުރެއްވިއެވެ.
ތޫފާނުން ސަލާމަތް ނުވެވުނަސް، ޤިޔާމަތް ދުވަހު ދަރިކަލުން ނަރަކައިން ސަލާމަތް ކުރެއްވުމަށް ﷲ ގެ ހަޟްރަތުގައި އެހިނދު ނޫޙުގެފާނު ދުޢާ ދެންނެވިއެވެ.
ފެނަށް ވުރެ އަލިފާން ގަދަފަދަވެގެން ވެއެވެ. އަދި އާޚިރަތުގެ އަޛާބަކީ ގަދަފަދަ ވެގެންވާ އަޛާބެކެވެ. ﷲ ތަޢާލާވަނީ އެކަލޭގެފާނުގެ އަހުލުން އެ ތޫފާނުން ސަލާމަތް ކުރައްވާނެކަމަށް ވަޢުދު ކުރައްވާފައެވެ. އެކަލޭގެފާނުގެ އަހުލުން އެ ބިރުވެރި ތޫފާނުން ސަލާމަތް ނުކުރައްވާ ހެއްޔެވެ؟ ހަމަޔަޤީނުންވެސް ﷲ ގެ ވަޢުދުފުޅަކީ ޙައްޤު އެއްޗެކެވެ.
___________________
މަޞްދަރު: قصص النبيين للأطفال
[1] 42 هود
[2] 43 هود
[3] 43 هود
[4] 43 هود
