އުފަންވުމާއި އިސްލާމުވެވަޑައިގެންނެވުން
ޢަލީގެފާނު އުފަންވީ ނަބިއްޔާ صلى الله عليه وسلم ނަބީކަމައިގެން ފޮނުއްވުމުގެ ކުރިންނެވެ. އެކަލޭގެފާނު އުފަންވި އަހަރާ ގުޅޭގޮތުން ވާރިދުވެފައިވާ ބަސްފުޅުތަކުގެ ތެރެއިން އެންމެ ޞައްޙަ ބަސްފުޅަކީ އެކަލޭގެފާނު އުފަންވީ ނަބީކަމައިގެން ފޮނުއްވުމުގެ ދިހަ އަހަރު ކުރިންނެވެ. [1] އެއީ މީލާދީ ގޮތުން 601 ވަނަ އަހަރެވެ.
ވަރަށް ތުއްޕުޅު އިރުއްސުރެ ޢަލީގެފާނު އުޅުއްވީ ނަބިއްޔާ صلى الله عليه وسلم ގެ އަރިހުގައެވެ. އެކަލޭގެފާނު ބޮޑުފުޅުވީ ނަބިއްޔާ صلى الله عليه وسلم ގެ އަރިހުގައި، އެކަލޭގެފާނުގެ ގެކޮޅުގައެވެ. ނަބިއްޔާ صلى الله عليه وسلم ނަބީކަމައިގެން ފޮނުއްވުމުން، ޢަލީގެފާނަށް އިސްލާމްދީނަށް ގޮވާލެއްވިއެވެ. އަދި ޢަލީގެފާނު ނަބިއްޔާ صلى الله عليه وسلم ގެ ދަޢުވަތު ޤަބޫލުކުރައްވާ، އިސްލާމުވެވަޑައިގެންނެވިއެވެ. އެހެންކަމުން ޢަލީގެފާނު ވެވަޑައިގެންނެވީ ކުޑަކުދިންގެ ތެރެއިން އެންމެ ފުރަތަމަ އިސްލާމުވީ ކުއްޖާއަށެވެ.
[1] ބައްލަވާ: السيرة النبوية لابن هشام (1 / 245).
