ދެވަނަ ދަރުސް (އިސްލާމުކަމުގެ ރުކުންތައް)
- އިސްލާމުކަމުގެ ފަސް ރުކުން ބަޔާންކޮށްދިނުން.
އެންމެ ފުރަތަމަ އަދި އެންމެ މަތިވެރި ރުކުނަކީ ﷲ ފިޔަވާ ޙައްޤުގޮތުގައި އަޅުކަންވެވޭ އިލާހަކު ނުވާކަމަށް ހެކިވުމާއި މުޙައްމަދުގެފާނީ އެކަލާނގެ ރަސޫލާކަމަށް ހެކިވުމެވެ. ޝަހާދަތުގެ ދެކަލިމައިގެ މާނައާއި ޝަރަޙަ އޭގެ ޝަރުތުތަކާއި އެކު ދެނެގަތުމެވެ.
- لَاإِلٰهَ – ނަފީކުރުން: ﷲ ފިޔަވާ ޙައްޤުގޮތުގައި އަޅުކަންކުރެވޭ އެއްވެސް އިލާހަކު ވާކަން ނަފީކުރުމެވެ.
- إِلَّا اللهُ – ޘާބިތުކުރުން: ޙައްޤުގޮތުގައި އަޅުކަންކުރެވެނީ ހަމައެކަނި ﷲ އަށް ކަމާއި އެކަލާނގެއަށް ޝަރީކަކު ނުވާކަން ޘާބިތުކުރުމެވެ.
لَاإِلٰهَ إِلَّا اللهُ ގެ ޝަރުތުތައް:
- ޖާހިލުކަން ނަފީކުރާ ޢިލްމު
- ޝައްކު ނަފީކުރާ ޔަޤީންކަން
- ޝިރުކު ނަފީކުރާ އިޚްލާސްތެރިކަން
- ދޮގުވެރިކަން ނަފީކުރާ ތެދުވެރިކަން
- ރުޅިވެރިކަން ނަފީކުރާ ލޯބިކުރުން
- ނުކިޔަމަންތެރުކަން ނަފީކުރާ ބޯލެނބުން
- ރައްދުކުރުން ނަފީކުރާ ޤަބޫލުކުރުން
- ﷲ ފިޔަވާ އަޅުކަންވެވޭ އެންމެހާ ފަރާތްތަކަށް ކާފަރުވުން
މިކަންވަނީ އަންނަނިވި ދެ ޅެން ބައިތުގައި ޖަމާކުރެވިފައެވެ.
عِلْمٌ[1] يَقِيْنٌ[2] وَإِخْلاَصٌ[3] وَصِدْقُكَ[4] مَعْ
مَحَبَّةٍ[5] وَانْقِيَادٍ[6] وَالقَبُوْلِ[7] لَهَا
وَزِيْدَ ثَامِنُهَا الكُفْرَان مِنْكَ بِمَا
سِوَى الإلهِ مِنَ الأَشْيَاءِ قَدْ أَلِهَا[8]
މާނައީ: ޢިލްމު[1]، ޔަޤީންކަން[2]، އިޚްލާޞްތެރިކަން[3] އަދި ތިބާ ތެދުކުރުމާއެކު[4] ލޯބިކޮށް[5]، ބޯލަނބާ[6]، ޤަބޫލުކުރުމެވެ[7]. އަދި ﷲ ފިޔަވާ އިލާހުންތަކެއްކަމަށް ހަދައިގެން އަޅުކަންކުރެވޭ އެންމެހާ ތަކެއްޗަށް ކާފަރުވުން[8] އަށްވަނަ ކަމަކަށް އިތުރު ކުރެވެއެވެ.
ދެން ހަމަ އެއާއި އެކު މުޙައްމަދުގެފާނީ ﷲ ގެ ރަސޫލާ ކަމަށް ހެކިވާނޭގޮތް ބަޔާންކުރުމެވެ.
އަދި އެކަމަށް ހެކިވުމުން ލާޒިމު ވާކަންތައްތައްވެސް ބަޔާންކުރުމެވެ. މިގޮތުން އެކަލޭގެފާނު ކުރައްވާފައިވާ ޚަބަރުތައް ތެދުކޮށް ކަށަވަރު ކުރުމާއި، އެކަލޭގެފާނުގެ އަމުރުފުޅުތަކަށް ކިޔަމަންގަތުމާއި، އެކަލޭގެފާނު ނަހީ ކުރައްވާ އެއްކިބާ ކުރުވާފައިވާ ކަންކަމުން ދުރުހެލިވުން އަދި ﷲ އާއި އެކަލާނގެ ރަސޫލާ صلى الله عليه وسلم ޝަރުޢުކުރެއްވި ގޮތަށް މެނުވީ އެކަލާނގެއަށް އަޅުކަންނުކުރުމެވެ.
- ދެން އެއަށްފަހު އިސްލާމްކަމުގެ ފަސްރުކުގެ ތެރެއިން ބާކީ ހުރި ކަންތައްތައް ކިޔަވާ ކުއްޖާއަށް ބަޔާން ކޮށްދޭންވާނެއެވެ. އެއީ:
- ނަމާދު(ޤާއިމުކުރުމާއި)،
- ޒަކާތް(ދިނުމާއި)،
- ރަމަޟާންމަހު ރޯދަ(ހިފުމާއި) އަދި
- ކުޅަދާނަކަންލިބިގެންވާ މީހާ ހުރުމަތްތެރިވެގެންވާ ﷲގެފުޅަށް ހައްޖުވުމެވެ.
ތިންވަނަ ދަރުސް (އީމާންކަމުގެ ރުކުންތައް)
އީމާންކަމުގެ ހަ ރުކުނެއްވެއެވެ. އެއީ:
- ﷲ އަށް އީމާންވުމާއި،
- މަލާއިކަތްބޭކަލުންނަށް އީމާންވުމާއި،
- ފޮތްތަކަށް އީމާންވުމާއި،
- ރަސޫލުބޭކަލުންނަށް އީމާންވުމާއި،
- އާޚިރަތް ދުވަހަށް އީމާންވުމާއި އަދި
- ﷲ ގެ ހަޟްރަތުން (ނިޔާކުރެވިފައިވާ) ހެޔޮ މިންވަރާއި ނުބައި މިންވަރަށް އީމާންވުމެވެ.
__________________________________
މި ފޮތުގެ އެހެނިހެން ދަރުސްތައް
