5. މިންވަރު ކަނޑައެޅުން
ވަރިކުރުމަށްފަހު ދެވޭ މުދަލުގައި ވަކި މިންވަރެއް ކަނޑައެޅުމުގައި ބަލާނެ ގޮތަކާމެދު ފިޤުހުވެރިންވަނީ ޚިޔާލު ތަފާތުވެފައެވެ. އެގޮތުން އެކަމުގައި ބަލާނީ ފިރިމީހާގެ ޙާލަތަށް ތޯ ނުވަތަ އަނބިމީހާގެ ޙާލަތަށް ތޯ ނުވަތަ ދެމީހުންގެ ޙާލަތަށް ތޯ ވާހަކަދެކެވިފައިވެއެވެ.
– ފުރަތަމަ ބަސްފުޅު: އެކަމުގައި ބެލެވޭނީ ފިރިމީހާގެ ތަނަވަސްކަން ހުރި މިންވަރަށް. [މިއީ މާލިކީ މަޛްހަބާއި ޙަންބަލީ މަޛްހަބާއި ޝާފިޢީ މަޛްހަބުގެ އެއް ބަސްފުޅެވެ.]
ދަލީލު: ﴿ وَمَتِّعُوهُنَّ عَلَى الْمُوسِعِ قَدَرُهُ وَعَلَى الْمُقْتِرِ قَدَرُهُ مَتَاعًا بِالْمَعْرُوفِ ﴾ [سورة البقرة ٢٣٦]
މާނައީ: “ތަނަވަސްކަން ލިބިގެންވާ މީހާގެ މައްޗަށްވަނީ، އޭނާގެ ވަރުން ދިނުމެވެ. އަތްމަތިދަތި މީހާގެ މައްޗަށްވެސްވަނީ، އޭނާގެ ވަރުން ދިނުމެވެ. ހެޔޮގޮތުގައި ދެވޭ މުދަލެއްގެ ގޮތުގައެވެ.”
މިއާޔަތުގައި މުޚާޠަބު ކުރެވިފައި މިވަނީ ފިރިންނަށެވެ.
– ދެވަނަ ބަސްފުޅު: އެކަމުގައި ބެލެވޭނީ އަނބިމީހާގެ ޙާލަތަށް. [ މިއީ ޝާފިޢީ މަޛްހަބުގެ ބަސްފުޅުވެ.]
ދަލީލު: ވަރިކުރެވުމަށްފަހު ދެވޭ މުދަލަކީ އަނބިމީހާގެ ފަރާތުން އުފާ ޙާޞިލުކޮށްފައިވާތީ ދެވޭ އެއްޗެކެވެ. އެހެންކަމުން އެކަމުގައި ބެލެވޭނީ އަނބިމީހާގެ ޙާލަތަށެވެ.
– ތިންވަނަ ބަސްފުޅު: އެކަމުގައި ބެލެވޭނީ ދެމަފިރިންގެ ޙާލަތަށް. [ މިއީ ޙަނަފީ މަޛްހަބުގެ ބަސްފުޅުވެ.]
ދަލީލު: ﴿ وَمَتِّعُوهُنَّ عَلَى الْمُوسِعِ قَدَرُهُ وَعَلَى الْمُقْتِرِ قَدَرُهُ مَتَاعًا بِالْمَعْرُوفِ ﴾ [سورة البقرة ٢٣٦]
މާނައީ: “ތަނަވަސްކަން ލިބިގެންވާ މީހާގެ މައްޗަށްވަނީ، އޭނާގެ ވަރުން ދިނުމެވެ. އަތްމަތިދަތި މީހާގެ މައްޗަށްވެސްވަނީ، އޭނާގެ ވަރުން ދިނުމެވެ. ހެޔޮގޮތުގައި ދެވޭ މުދަލެއްގެ ގޮތުގައެވެ.”
މިއާޔަތުގައި މިވަނީ “ހެޔޮގޮތުގައި” މުދަލެއް ދިނުމަށެވެ. އެހެންކަމުން އެކަމުގައި ދެމީހުންގެ ޙާލަތަށްވެސް ބަލަން ޖެހެއެވެ.
ރާޖިޙުބަސްފުޅު: އެކަމުގައި ބަލަން ޖެހޭނީ ދެމަފިރިންގެ ޙާލަތަށެވެ. އޭރުން މިކަމުގައިވާ ހުރިހާ ދަލީލަކަށް ޢަމަލުކުރެވޭނެއެވެ.
ނޯޓު: ނަމަވެސް ދުނިޔޭގެ ބައެއް ޤައުމުތަކުގައި މިއާ ޚިލާފަށް ޢަމަލުކުރަމުން ދެއެވެ. މުދަލުގެ މިންވަރު ކަނޑައެޅުމުގައި އެ ޤައުމުތަކުގައި ބަލަނީ ހަމައެކަނި އަނބިމީހާއަށް ވަރިކުރުމުގެ ސަބަބުން ލިބޭ ގެއްލުމަށެވެ. ޝައްކެއްވެސް ނެތް ގޮތުގައި މިފަދަ ކަންކަމަކީ ފިރިމީހާއަށް ދެވޭ އަނިޔާއަކަށްވުން އެކަށީގެންވެއެވެ.
= ނުނިމޭ =
ލިޔެ ޖަމާކުރީ
އައްޝައިޚް ޔާމީން ނާޞިރު
އައްޝައިޚް ޢިމްރާން މުޙައްމަދު
________________________
