- ޝައްވާލުމަހަކީ ޙައްޖުގެ މައްސަރުތަކުންގެ ތެރެއިންވާ ބަރަކާތްތެރި މައްސަރެކެވެ.
- ޝައްވާލުމަހުގެ އެންމެ ޚާއްސަ އެއް އަޅުކަމަކީ ރަމަޟާންމަހުގެ ރޯދައާއި ވިދިގެން ޝައްވާލުމަހުން ހަރޯދަ ހިފުމެވެ.
- ޝައްވާލުމަހުގެ ހަރޯދަ ހިފުމަކީ މުސްތަޙައްބު ސުންނަތެކެވެ.
- ރަމަޟާންމަހުގެ ރޯދައާއި ވިދިގެން ޝައްވާލު މަހުން ހަރޯދަ ހިފުމީ މުޅި އަހަރުދުވަހު ރޯދަހިފުންފަދަ މަތިވެރި އަޅުކަމެކެވެ.
- މުޅި އަހަރު ދުވަހު ރޯދަހިފުމަށް ވާ ގޮތަކީ ކޮންމެ ހެޔޮކަމަކަށް ދިހަ ހެޔޮކަން ލިބޭނެކަމަށް ﷲ ތަޢާލާ ބަޔާންކުރައްވާފައިވާ އުސޫލުގެ ދަށުންނެވެ. މިއުސޫލުގެ ދަށުން ބަލާއިރު ރަމަޟާންމަހު ރޯދަ ހިފުމުން ދިހަ މަހު ރޯދަ ހިފިފަދައެވެ. އަދި ޝައްވާލު މަހުން ހަރޯދަ ހިފުމުން ފަސްދޮޅަސް ދުވަހު (ދެމަސްދުވަހު) ރޯދަހިފުންފަދައެވެ. އަހަރު ދުވަހު ރޯދަ ހިފުންވަނީ މިފަދައިންނެވެ.
- ޝައްވާލު މަހުގެ ހަރޯދަ ހިފުމުގައި އެންމެ އިތުރުކަން ބޮޑު ގޮތަކީ ރަމަޟާންމަހުން ގެއްލިފައިވާ ރޯދަތައް ޤަޟާކުރުމަށްފަހު ހިފުމެވެ.
- ރަމަޟާންމަހުގެ ރޯދަ ޤަޟާނުކޮށްވެސް ޝައްވާލު މަހުގެ ހަރޯދަ ހިފިދާނެކަމަށް ބައެއް ދަންނަބޭކަލުން ވިދާޅުވެއެވެ.
- ރަމަޟާންމަހުގެ ފަރުޟު ރޯދަ ޤަޟާކުރުމުގެ ނިޔަތާއި، ޝައްވާލުމަހުގެ ހަރޯދަ ހިފުމުގެ ނިޔަތް ޖަމާޢަކޮށްގެން ރޯދައެއް ނުހިފޭނެއެވެ. (ޔަޢުނީ ދެބާވަތުގެ ރޯދަ ހިފަންޖެހޭނީ ވަކިވަކިންނެވެ).
- ޝައްވާލު ހަރޯދަ އެކުއެކީގައިވެސް ނުވަތަ ވަކިވަކިން މަހުގެ އެކި ދުވަސްތަކަށް ބަހާލައިގެންވެސް ހިފިދާނެއެވެ.
- ޝައްވާލުމަހުގެ ސުންނަތް ހަރޯދައާއި، ހޯމަ ބުރާސްފަތީގެ ރޯދައާއި، މެދުފޮއި ރޯދަ ފަދަ ސުންނަތް ރޯދަތަކުގެ ނިޔަތް ޖަމާޢަކުރެވިދާނެއެވެ. (ޔަޢުނީ މިސާލަކަށް ހޯމަ ބުރާސްފަތީގެ ސުންނަތް ރޯދަ ހިފާއިރު ޝައްވާލު މަހުގެ ހަރޯދަ ހިފަންވެސް ނިޔަތް ގަނެފިނަމަ ދެރޯދައިގެ ޘަވާބުވެސް ލިބޭނެއެވެ).
- ޝައްވާލު ހަރޯދަ ހިފައި ނިންމުމަށް ފަހު ފާހަނގަކުރުން ޝަރުޢުވެގެންވާ ޢީދެއް ނުވެއެވެ.
ނަޞްރު ލިބެނިވި ޖަމާޢަތް
16/04/2024
02:11
