33- އިސްލާމްދީނުގެ މަރުތަބާ ތަކުގެ ތެރެއިން ދެވަނަ މަރުތަބާއަކީ ކޮބާ؟
ޖަވާބު: އެއީ އީމާންކަމެވެ.
34- އީމާންކަމުގެ ގޮފިތައް ކިތައް؟
ޖަވާބު: އީމާންކަމުގެ ގޮފިތައް ހަތްދިހަ އެތައްބަޔަކަށް ބެހިގެންވެއެވެ. އޭގެ ތެރެއިން އެންމެ މަތީގައިވަނީ لاَ إِلَه إِلاَّ اللهُ އެވެ. އޭގެ އެންމެ ދަށުދަރަޖައަކީ މަގުމަތީގައި މީހުންނަށް އުނދަގޫވާގޮތަށް ހުންނަ އެއްޗިހި އެއްފަރާތްކޮށްލުމެވެ. ލަދުވެތިކަމަކީ އީމާންކަމުގެ ގޮފިތަކުގެ ތެރެއިން ގޮތްޕެކެވެ.
35- އީމާންކަމުގެ ރުކުންތައް ކިތަކެއް؟
ޖަވާބު: އީމާންކަމުގެ ރުކުންތައް ހައެކެވެ. އެއީ މާތް ﷲ އަށް އީމާންވުމާއި، އެއިލާހުގެ މަލާއިކަތުންނަށް އީމާންވުމާއި، އެއިލާހު ބާވައިލެއްވި ފޮތްތަކަށް އީމާންވުމާއި، އެއިލާހު ފޮނުއްވި ރަސޫލުންނަށް އީމާންވުމާއި، އާޚިރަތްދުވަހަށް އީމާންވުމާއި، ޤަދަރުގެ ހެޔޮމިންވަރާއި ނުބައިމިންވަރަށް އީމާންވުމެވެ.
36- އިސްލާމްދީނުގެ މަރުތަބާތަކުގެ ތެރެއިން ތިންވަނަ މަރުތަބާއަކީ ކޮބާ؟
ޖަވާބު: އެއީ އިޙްސާންކަމެވެ. އޭގައި ވަނީ އެންމެ ރުކުނެކެވެ. އެއީ ތިބާއަށް ﷲ ސުބުޙާނަހޫ ވަތަޢާލާ ދެކެދެކެހުރެ އަޅުކަންކުރާފަދައިން އަޅުކަންކުރުމެވެ. އެހެނީ ތިބާއަށް އެއިލާހު ނުފެނުނުކަމުގައިވިޔަސް އެއިލާހު ތިބާ ދެކެދެނެވޮޑިގެންވެއެވެ.
= ޝައިޚުލް އިސްލާމް މުޙައްމަދު ބިން ޢަބްދުލްވައްހާބް ލިޔުއްވާފައިވާ ދަލާއިލުއްތައުޙީދި (ތައުޙީދުގެ ދަލީލުތައް) ގެ ތަރުޖަމާ =
